Sha u DC-EJHD, ujor ka STEDS bad ka KSU-NC halor ka jingïap pathar ki dohkha ha ka wah Lukha

Khliehriat Lber 23 : Halor ka jingïap pathar ki dohkha ha ka wah Lukha kaba don ha Sonapyrdi, East Jaiñtia Hills District, kaba la jia hynnin ka sngi, ha kaba ki dohkha kiba la ïap bad kito kiba la jan iap ki la shu per halor ka sla um bad la suba jur ruh ba ka dei namar ka jingpyntuid jakhlia na ki karkhana dewbilat, halor kane ki nongïalam jong ka Sonapyrdi Tourism and Economic Development Society bad ka Khasi Students Union Narpuh Circle mynta ka sngi ki la leit ban buh da ka jingthoh kum ka jingujor hakhmat u Deputy Commissioner ka East Jaiñtia Hills District ha Khliehriat.
Na ka liang ki nongïalam jong ka KSU Narpuh, ba kynthup u President, u bah K.S.Schiang, u General Secretary, u bah S.Bamon, ki la byrngem ruh ba kin sa leit ban ujor da ka PIL sha ïingbishar jong ka High Court, ki la ong ruh ba kane ka jingthmu jong ki ban leit ujor sha ïingbishar ka dei namar ba man la ka por ki la dep ban ujor, sha ka sorkar, kumjuh ruh sah ki bor district halor ka jingiap ki dohkha, hynrei kane ka ïai jia shi iai jia, na kata ka daw ka seng ka thmu ban ujor noh sha ka High Court ban dup lap shai kdar ïa ka daw jong ka jingïap ki dohkha ha katei ka wah Lukha.
Katkum ki shithi ujor ba la soi da u General Secretary jong ka Sonapyrdi Tourism Economis Developmet Society (STEDS), u bah T.L.Gympad, kumjuh ruh ka shithi na ka KSU Narpuh ba la soi da u President bad u General Secretary, ki la ïathuh ïa ka jingjia kaba la jia hynnin ka sngi, ha kaba ki dohkha kiba la ïap ki la per halor ka sla um, ki don ruh bun ki dohkha kiba la jan iap, ki bym lah shuh ban jngi ha um, ki la pynpaw ruh ba imat kane ka jingiap ki dohkha, ka dei namar ka jingpyntuid jakhlia chemical na ki karkhana dewbilat, kaba ki pyntuid sha ka wah Lunar kaba ïasoh bad ka wah Lukha, na kata ka daw ka wah Lukha kan sa kylla sniew.
La ong ruh ba kane ka jingjia ba ïap ki dohkha ka la jia man la u snem, kata naduh u snem 2007 bad ka ju jia ha ka por ba ther jur u slap uba neh ar sngi lai sngi, ha ka por ba heh ka um “Lada kane ka dang ïai jia shi ïai jia, kan pyndkhoh bad kan pynsep ei ïa ka jingthmu ka STEDS, kaba don ka jingthju bad jingangnud ban kyntiew ïa kane ka jaka kum kawei na ki jaka jngohkai pyrthei” la pynpaw ka STEDS.
Na ka liang ka seng pat, ka la pynpaw ba , ki bor district jong ka East Jaiñtia Hills District, ki la pyntreikam ïa ka project pynkhuid ïa ka wah kaba ha ka mang tyngka kaba T2.5 klur tyngka ba la bei tyngka da ka District Mineral Funding Trust, ha kaba la pynkhuid ïa kane ka wah da kaba pyndonkam ïa ki jingthnung ne sohpailen ba la tip kum ki Algae, kane ka long ban pynbha pat ïa ka um, ka seng mynta ka kwah ban tip shai ba ka jingkhuid ne ka PH Level jong ka um ka la don haduh katno, haba la pyntreikam ïa kane ka project.
Ka KSU Narpuh Circle lem bad ka STEDS, ki kyntu ïa ki paidbah ba kim dei banbam ïa kito ki dohka kiba la ïap ba ki la tam ne khar na ka wah, ïoh kan ktah ïa ka koit ka khiah, ha kajuh ka por, ki kyntu jur ïa u Deputy Commissioner, un shim khia halor kane ka kam.
La ïathuh ruh ba na ka liang u Deputy Commissioner, u Abhilash Banarwal, IAS, u la bthah ïa ki dkhot ka seng ba kin wanrah ïa ki dohkha kiba la ïap ba un phah test ïa ki ban dup lap ïa ka daw jong ka jingiap ki dohkha.