ïakynduh ka JSM ïa u DC ban dawa maramot mardor ïa ka surok Jowai Bypass bad Amlarem-Padu

Khliehriat naiwieng 09: Ka Jaiñtia Students’ Movement (JSM), Western Region, ka la leit ban aiti da ka dorkhas lyngba u Deputy Commissioner, West Jaintia Hills District, sha ka Tnad ba dei khmih ban dawa ban maramot mardor ïa ka surok Jowai Bypass Road (Mukhla-Mihmyntdu) bad ka surok Amlarem–Padu.
Ka seng lyngba u kyrwoh ka pynpaw ka jingsngewkhia kaba jur halor ka jingsniew jong kine ki surok kaba la dap satang da ki thliew ki syar bad ki bynta ka surok Jowai Bypass kiba la julor bad kiba buh jingma ïa ka jingshngaiñ jong ki nongleit nongwan, ki khynnah pule, ki nongñiah kali bad kiwei pat kiba pyndonkam ïa kane ka surok.
Ha kane ka jingïakynduh u DC u la kular ba na ka liang ki bor district kin pyrshang katba lah ban pynthikna ban pynbha ïa ki bynta jong kane ka surok khnang ban pynsuk ïa ka leit ka wan jong ki paidbah.
Ka memorandum ka kdew ruh ïa ka hukum ba la pynmih ha ka 3 tarik Lber 2023 da ka Ïingbishar ba donburom jong ka Meghalaya High Court ha ka mukotduma Kynjaimon Amse v. National Highways Authority of India & Others, PIL No. 11 of 2022, kaba ïadei bad ka jinglong jingman jong ka Jowai Bypass kaba 7.997 km.
Ka seng ka ai khublei ïa ka jingkular ba la ai da une u heh ka District bad ka khmih lynti ba ki bor ba dei khmih kin shimkhia ban pynkloi ïa kane ka jingmaramot khlem da pynslem na ka bynta ka jingshngaiñ bad ka jingmyntoi jong ki paidbah.