Pyndep ki 34 ngut ki samla ban shah hikai na ka MPSS-Security Agency Training Center

Jowai, Naiwieng 11: Haduh 34 ngut ki samla kiba kynthup ïa 22 ngut ki shynrang bad 12 ngut ki kynthei kila pyndep ïaka jingshah ai jinghikai kaba 45 sngi, haka 16th Batch, na ka jaka ai jinghikai jong ka MPSS-Security Agency Training Center, kaba don ha Thadmuthlong-C (Phramer) West Jaiñtia Hills District, kane ka Center ka dei ruh kaba la ithuh da ka Home Police jong ka sorkar jylla.
Mynta ka sngi 11.11.2026, la pynlong ïa ka jingïalang leh burom (Pass Out Parade) ïa kitei ki samla kiba la pass ïa ka jingai jinghikai, ha kaba u MLA ka Umroi u ma Damanbait Lamare u la long u kongsan, ha ka jingïadon lang ruh u MDC ba shu sieh ka JHADC ma Octamewot Lamin kum u symbud kongsan, u Tbn. F. Kya, kiwei de kiba la shah khot snewbha, lem bad ki kmie ki kpa bad kiba ha ïing ha sem jong ki samla kiba la pyndep ïa kane ka jingai jinghikai. Ïa ka jingpynbam smai ïa kitei ki samla la pyndep da u ma P Muksor uba long u Managing Director jong ka MPSS.
U kongsan u bah Damanbait Lamare, haba kren ula ai ka jingïaroh ïa u ma P. Muksor uba la don ïa kane ka mynsiem bad ïalam lynti ïa ki khun samla ha ka jingïadei bad ka lad ïoh kam ïoh jam ha kum kine ka por ba mynta kiba kyrduh kam kynduh jam, U ma Lamare ula kyntu ruh ïa ki samla kiba la pass ïa kane ka jingai jinghikai bad ki dei ban don ka burom ka akor bad ka jingïai shah bad ban bud ïa ki jinghikai kiba ki la ïoh na kane ka jaka ai jinghikai.
U ma P. Muksor uba long ruh u MD kane ka jaka ai jinghikai, ula ïathuh ba kane ka jingai jinghikai ïa ki samla ka long kum ka jingsdang ïa ka kam ka jam jong ki ha ka liang ka Security, ha kaba nangne kila ïoh shibun ki jinghikai haki rukom kilan met bapher bapher, ka rukom treikam bad ka akor ka burom. Ula ong ruh kine ki samla kiba la dep ban shah hikai kan pynsuk shibun eh ïa ki ban wad ïa ki kam Security hadien ba ki la ïoh ïa ka certificate kaba la pynithuh da katei ka jaka hikai MPSS.
Na ka liang u ma Muksor u la kyntu ïa u kongsan bad kumjuh ïa kiwei ba kin ai lad ïa kum kine ki samla kiba la pyndep ïa kane ka jingshah ai jinghikai Security ba kin ïoh ban trei kum ha ki kharkhana Dewbilat (Cement Factory) kiba don bun tylli ha ri Lum Jaiñtia.
Shuh shuh u la ong kumba long mynta kitei ki factory ki pyndonkam ne ai ïa ka kam Security ha ki kharkhna jong ki, da ki briew kiba na bar jong ka jylla, da kaba u la ong, ba haba don ki briew jong kane ka thaiñ ne jylla kiba la nang ne la tbit ban trei ïa kane ka kam, ki dei ban ai shwa ïa ki trai jylla. Shuh shuh u la ong ba kum kane ka kam Security, ka dei ruh na ka bynta ki ophis, ki Hospital bad kiwei de jaka.
Kiba bun na kiba kren ha kane ka jingïalang ki la ai mynsiem shuh shuh ïa u ma Muksor ba un dang ïaid shaphrang ha kane ka kam bad ban ai ka jinghikai kaba kham bha shuh shuh ïa ki samla kiba thrang ban wan shah hikai lyngba kane ka Center.