T. 44 lak la tei ïa ka ïing thymmai jong ka Khlur Rit Govt LP School Lower Mawpud, plie paidbah u MLA Ranikor

Mawkyrwat, ‘Naiwieng 11 : Ka la long shisha ka jingkmen na ka bynta ki khynnah skul jong ka Khlur Rit Government Lower Primary School Lower Mawpud, South West Khasi Hills District ha kaba mynta ka sngi ka 10 tarik u ‘Naiwieng, 2026 ka la ïoh da ka ïing Dewbilat kaba paka ha kaba kane ia ka skul ha u snem 2021 ka la don ka jingtwa khyndew bad kaba la wanrah ka jingpynjot ïa kane ka jaka pule.
Kumta, mynta ka sngi na ka liang u Bah Pius Marweiñ, MLA/MDC jong ka Ranikor Konstitwensi u la ïoh ban plie ia ka ïing ne ka building ba thymmai ba la pyntrei lyngba ka School Infrastructure Upgradation Project (Phase-III), kaba la bei tyngka lyngba ka State Scheme jong ka Sorkar Meghalaya, ha kaba la mang pisa haduh T. 44,79,448/- (Sawphew Saw Lak Hynñiewphew Khyndai Hajar Saw Spah Sawphew Phra Tyngka).
U Bah Pius Marweiñ haba kren ha ka jingïalang, u la pynpaw ba hapoh ka South West Khasi Hills District, ki don kumba 36 tylli ki skul kiba la dep ban mang pisa lyngba ka Mission Education, bad na kine, palat 20 tylli ki skul ki la dep ban shna thymmai hapoh ka Ranikor Constituency. U la ong ruh ba kane ka long ka jingkyrkhu kaba khraw ïa ki kmie ki kpa bad ki khun jong ki, namar kan pynsuk bad pynshlur ïa ki ban phah skul ïa la ki khun ha ki skul sorkar.
Ula pynpaw ruh ba ha ki por kiba la leit noh, ka jinglong jingman jong ki katto katne ki ïing skul sorkar kim long kaba biang, bad ka la pynlong ïa ki khynnah ban don ka jingsyier ha kaba pyndonkam ïa ki jingtei kiba ym pat long kiba skhem bad kiba shngaiñ. Kumta, ula pynpaw ba kum u MLA ula shim ïa ka jingkitkhlieh ban buddien bad wad ki lad ki lynti ban pynbha ïa ki ïing skul, ki surok, ka umbam umdih bad kiwei pat ki jingdonkam jong ki paidbah lyngba ki skhim MLA bad MDC.
Namarkata, u la kular ruh ba nangne shakhmat un dang ïai bteng ïa ka jingbuddien halor ki jingdonkam jong ki skul bad kiwei de ki jingdonkam, khnang ba ki khynnah skul kin ïoh ïa ki jingtei bad ki jingdonkam kiba biang, kiba shngaiñ bad kiba pynsuk ïa ki nongpule bad kumjuh ruh ki lad jinghikai.
Ha kane ka sngi ladonlang u Bah Kynsai Thongni, Junior Engineer, Education Department, South West Khasi Hills District, u Babu Khlaiñ Mylliem, Head teachers jong ka Khlur Rit LP School Lower Mawpud, u bah Robert Basan uba dei Myntri ka shnong Lower Mawpud, ki khynnah skul, ki nonghikai lem bad ki paidbah nongshong shnong.