Ai mynsiem bad jingïaroh u Bah Sniawbhalang ïa ka jingïatreilang ki samla Khasi shabar jylla

Bengaluru, Naiwieng 11: Ka Khasi Students’ Union Bengaluru Unit ha ka 7 tarik u Naiwieng 2026, ka la pynlong ïa ka Hynñiewtrep Cultural Meet 2026 ryngkat bad ka jingrakhe ïa ka jingdap 10 snem jong ka seng, ha St. Claret College Autonomous, Bengaluru.
Ha kane ka sngi kyrpang, ka seng ka la don ïa ka jingkyrkhu bad jingdonlang u Kongsan, u Ma Sniawbhalang Dhar, Hon’ble Deputy Chief Minister jong ka Sorkar Meghalaya. Kumjuh ruh u Symbud Kongsan, u Bah Lambokstarwell Marngar, President barim jong ka Khasi Students’ Union (KSU) Sengkmie, u Kongsan Kyrpang, Bah Iada Martin Marbaniang, IPS, DIGP (Administration), Bengaluru, Karnataka, bad kongsan kyrpang u samla Pynshaiborlang Rani, Assistant General Secretary jong ka KSU Sengkmie.
La sakhi lang ruh ïa ka jingdonlang u ryngkat bad kiwei kiwei ki nongïalam barim jong ka KSU Sengkmie.
Ïa ka prokram la pynïaid da u Samla Pyndap Umsong, Assistant Secretary jong ka KSU Bengaluru Unit, bad ka Kong Rufica Lyngdoh, Secretary jong ka Bengaluru Christian Community of Meghalaya.
Ha ka jingkren pdiang burom, u Samla Donboklang Nongphud, President jong ka KSU Bengaluru Unit, u la pynpaw ïa ka jingsngewnguh bad ka jingsarong halor ka jingïaid lynti jong ka seng kaba la kynjoh sha ka 10 snem.U la pynkynmaw ruh ïa ka jingtrei shitom, ka jingïatylli bad ka jingïarap mar kylliang kaba la long nongrim ïa ka jingkhlaiñ jong ka seng.
Ha katei ka sngi, u Bah Lambokstarwell Marngar u la ai ïa ki kyntien ai mynsiem bad jingkyrshan ïa ka seng, khamtam eh ïa ki samla Khasi kiba sah, pule bad trei ha Karnataka, ban ïaineh ha ka jingïatylli, ban burom ïa la ka riti dustur bad ban long ki nongmihkhmat kiba bha jong ka jaitbynriew Hynñiewtrep.
Hadien kane, u Kongsan, u Ma Sniawbhalang Dhar, Deputy Chief Minister jong ka Sorkar Meghalaya, u la ai ïa ki kyntien ai mynsiem bad jingïaroh ïa ka jingïatreilang jong ki samla Khasi shabar jylla, da kaba pynshlur ïa ki ban long kiba trei shitom, kiba don ka jingkitkhlieh bad ban bteng ban kyntiew ïa la ka jaitbynriew.
Nalor ki jingkren na ki nongïalam, ka prokram ka la long kaba itynnad lyngba ki jingrwai bad ki jingshad tynrai bapher bapher kiba la pyni da ki samla pule bad ki samla Khasi kiba sah ha Bengaluru.Ka KSU Mangalore Unit ruh ka la wan ban ïashim bynta bad ban ai ka jingkyrshan ïa kane ka prokram.
Ha kane kajuh ka sngi, na ka liang jong ka KSU Bengaluru Unit u President Samla DDonboklang Nongphud u aiti ruh ïa ka Memorandum sha u Deputy Chief Minister, u Ma Sniawbhalang Dhar, ban pynsngew ïa ki jingeh, ki jingdonkam bad ki mat kiba ktah ïa ki paid Khasi bad ki nong Meghalaya kiba sah, pule bad trei ha Bengaluru, Karnataka bad ha kiwei pat ki bynta jong ka South India.
Kine ki saw tylli ki mat ba kongsan kiba la buh ha ka Memorandum ki long:
Meghalaya House ha Bengaluru: Ban pynkloi bad pyndep noh ïa ka jingtrei jong ka Meghalaya House ha Bengaluru khlem da pynslem shuh, ryngkat bad ka jingdon jong ka ophis jingïadei jong ka Sorkar Meghalaya.
Direct Flight: Ban pynïoh ïa ka liengsuiñ kaba leit beit na Bengaluru sha Shillong bad na Shillong sha Bengaluru khan kham suk ia ki nong Meghalaya bad ia ki south India kiba leit jngoh kai ha Meghalaya
Jingkit ïa ka Metïap: Ban pynbiang ïa ka jingïarap pisa bad ka rukom pynkit ïa ki metïap jong ki nong Meghalaya kiba khlad noh ha Bengaluru bad ha kiwei ki bynta jong ka Ri India, sha la ki shnong, hynrei bun kiba nym lah ban kit shala shnong ki hap pyndap kam ha Karnataka
CM Connect: Ban pynïoh ïa ka CM Connect Emergency Helpline kaba treikam 24 kynta, kaba don ruh ïa ka WhatsApp service, khnang ba ki nong Meghalaya kiba sah shabar jylla kin lah ban ïoh jingïarap ha ki por ba donkam kyrkieh.
Ka KSU Bengaluru Unit ka kyrmen ba ka Sorkar Meghalaya kan shimkhia ïa kine ki mat bad ban leh ïa kaba donkam na ka bynta ka bha ka miat, ka jingshngaiñ bad ka jingmyntoi jong ki paid Meghalaya kiba sah ha Bengaluru bad ha kylleng ka South India.
Kane ka Hynñiewtrep Cultural Meet 2026 kam dei tang ka prokram ban pyni ïa ka kolshor bad ka riti dustur tynrai, hynrei ka long ruh ka rynsan ban pynkhlaiñ ïa ka jingïatylli, ka jingïadei bad ka jingïalong kawei hapdeng ki samla Khasi kiba sah shabar jylla.