Nongpoh, Naiwieng 11: 3 ngut ki runar kila shah rai pynrem haka iingkashari jong ka Special Judge (POCSO), Ri-Bhoi District haki ar tylli ki jingjia bad naka liang ka iingkashari kala rai pynrem da kaba set phatok 20 snem ryngkat ka kuna.
Naka liang ka iingkashari jong ka Special Judge (POCSO), Ri-Bhoi District kala rai pynrem ïa u Kitbok Mynsong (24) na ka shnong Kjatlumshami kaba hap ha Nongpoh Police Station haba ïadei bad ka mukotduma bala register ha Nongpoh Women Police Station hapoh ka jingtohkit ka WPSI S Ryngksai bad hadien ka jingtohkit ki pulit kila chargesheet.
Hadien ka jingbishar jong ka kong RM Kharsyntiew Special Judge (POCSO), Ri-Bhoi District la shem ba utei u runar u la leh ïa katei ka kam bymman bad rai pynrem ïa u hapoh ki kyndon aiñ 3(a)/4(2) bad 5(j)(ii)(n))/6 jong ka POCSO Act bad ngat haka jingshah pynsajia kaba 20 snem ha phatok ryngkat ka kuna.
Ha kawei pat ka jingjia, naka liang ka iingkashari jong ka Special Judge (POCSO), Ri-Bhoi District kala rai pynrem ïa u Skhemborlang Khardewsaw (25) bad u Polishal Khardewsaw (23) naka shnong Sohkyndur kaba hap ha Umiam Police Station, haba ïadei bad ka mukotduma bala register ha Nongpoh Women Police Station hapoh ka jingtohkit ka WPSI W Khongsit bad hadien ka jingtohkit ki pulit kila chargesheet.
Hadien ka jingbishar jong ka kong RM Kharsyntiew Special Judge (POCSO), Ri-Bhoi District la shem ba kitei ki ar ngut kila leh ïa katei ka kam bymman bad rai pynrem ïaki hapoh ki kyndon aiñ 5(m) (n)/6 POCSO Act, 2012 bad ngat haka jingshah pynsajia kaba 20 snem ha phatok ryngkat ka kuna.
