Naduh u snem 1926 bala sdang tang haka iing siej, dap 100 ka Shree Shree Maa Kali Mandir ha Nongpoh

Nongpoh, Naiwieng 11: Wat hapdeng ki jingeh bapher bapher ha kaba sdang, ka Shree Shree Maa Kali Mandir, kaba don hapdeng jong ka sor Nongpoh, mynta ka la kynjoh sha u mawmer kaba kongsan jong ka jingdap 100 snem, da kaba rakhe ïa ka shispah snem jong ka jingïaid lynti kaba dap da ka jingngeit, ka jingïaishah bad ka jingïatreilang jong ki paid riewngeit Hindu.
Ïa kane ka Mandir la seng nyngkong ha u snem 1926 da u (L) Kali Podo Dey, ha kaba la sdang tang da kawei ka ïing rit kaba la shna da ki siej ha pdeng ka sor Nongpoh. Naduh kata ka por, lyngba ka jingaiti bad ka jingtrei shitom jong ki paidbah riewngeit Hindu, katei ka jaka mane blei ka la nang roi bad pynbha suki pa suki haduh ba ka la kylla long kawei na ki jaka mane blei kiba iphuh iphieng kumba ka long mynta.
Kum shi bynta jong kane ka jingdap 100 snem, ka Shree Shree Maa Kali Mandir Committee, hapoh ka jingïalam jong u Khukon Baroi kum u President, u Babul Roy kum u General Secretary, u Moni Dey kum u Treasurer, ryngkat bad kiwei ki dkhot jong ka Committee, ki la pynlong ïa ka jingrakhe lehkmen kaba la neh haduh shi taïew lynter, kaba la sdang naduh ka 4 tarik haduh ka 10 tarik u Naiwieng 2026, kaba la ïasnoh ruh bad ka jingrakhe ïa ka jinglehkmen Diwali.
Haba kren sha ki lad pathai khubor, u Gautam Das, uba dei u dkhot jong ka Mandir Committee, u la ïathuh ba ka jingïaid lynti jong kane ka Mandir kam shym la long kaba suk, hynrei ka dei ka jingmih na ka jingaiti lut bad ka jingïatreilang jong ki paidbah riewngeit kiba la noh synñiang ha ki liang bapher bapher ban kyntiew bad pynbha ïa kane ka jaka mane blei bad ieng kumba ka long mynta.
U la ïathuh ruh ba ha kane ka jingrakhe dap 100 snem la pynlong ïa ki prokram bapher bapher ha ka shi taïew lynter, bad la pynkut ïa ka jingrakhe da ka Musical Concert kaba la long ha khmat jong ka Nongpoh Town Shopping Complex, kaba la wanrah ïa ka jingkmen bad ka jingïashim bynta jong ki paidbah.
Ha kajuh ka por, haba ai ïa ka khubor sngewbha Diwali, u Gautam Das u la pynpaw ïa ka jingkyrmen ba kane ka jinglehkmen kan long ka dak jong ka jingjop kaba bha ïa ka jingsniew bad ba ka jingshai kan pynduh ïa ka jingdum ha ka jingim jong uwei pa uwei, khnang ba ka jingim kan long kaba dap da ka jingsuk, ka jingkmen bad ka jingïatylli.