Nongpoh, Lber 23: Ki paidbah khamtam ki khynnah skul ba leit ba wan ha shilynter ka surok Nongpoh- Umden-Sonapur khamtam ha ka thaiñ Marmaiñ ki hap ban mad ka jingeh kaba khraw haka leit ka wan namar ka jingkylla pung ktieh jong u surok NUS, baka sorkar haduh mynta kam pat leh eiei ban sïang rong bad pynmang skhim na ka bynta utei u surok u ba dei u budlum jong ki spah tylli ki shnong ha katei ka thaiñ ban mih ruh shaduh Assam.
Ka long ruh kaba isangsot ban iohi ba ki khynnah skul kiba ïaid lyngba utei u surok ki hap ban loit ïaki juti ban bat ha kti namar ka jingktieh jong u surok naka jingther u lap bah ha kine ki khyndiat sngi bad don ruh ki jaka ba wat ki kali ki shem jingeh ban ïaid, nalor ba utei u surok u dei uba la jot rathai bad donkam ban ka jingpynmang skhim ban siang rong thymmai.
Kiba bun naki paidbah ha katei ka thaiñ, kila ud la nam khamtam ki khynnah pule kiba ju leit ju wan man ka sngi ban beh klas shaduh Nongpoh, ha kaba nalor ka jingsniew u surok bad dap da ki thliew ki syar, mynta ka por slap ki paidbah ki hap ban mad jingeh sa haka jingktieh u surok.
Katto katne ki riew rangbah kila pynpaw ruh ba naka liang ka sorkar lyngba u Bah Prestone Tynsong Symbud Myntri Rangbah u la dep ban kular bunsien ban pynbha ne siangrong noh ïa utei u surok, hynrei kumba long haduh mynta kita ki jingkular bala dep wat ban mang pisa kila shu sahkut tang haki jingkular, katba ki paidbah nongleit nongwan ki hap ban mad jingeh bad syrtok man ka sngi naka jingsniew bad ktieh jong u surok.
