Duh mynsiem ki nongri syiar ka jylla ba jyllei palat ki syiar nabar

Nongpoh, Naiwieng 10: Ka Meghalaya Poultry Farmers & Welfare Association ka la pynmih biang ïa ka jingdawa sha ka sorkar jylla ban pynurlong noh ïa ka jingkular ban buh ïa ka Quarantine Check Post ha ki thaiñ Umling, khnang ban peit bñiah ïa ka koit ka khiah jong ki syiar kiba wan na shabar ka jylla bad ban tehlakam ïa ka jingsaphriang jong ki jingpang.
Haba kren sha ki lad pathai khubor, u Bah Daminot Sylliang President ka Meghalaya Poultry Farmers & Welfare Association u la pynpaw ba kane ka jingdawa jong ka Association kam dei shuh kaba thymmai, namar ba ka kynhun ka la dep ban ïakynduh ïa u Myntri Rangbah ka jylla bad kumjuh ruh ïa u Myntri ba dei peit ïa ka tnad Veterinary, ban pynsngew ïa ka jingdonkam ban don noh ïa ka jaka peit bñiah ïa ki syiar kiba wan nabar ka jylla.
U la ïathuh ruh ba ha ki jingïakren kiba la dep, ka sorkar ka la kular ban buh noh ïa ka Quarantine Check Post ha ki thaiñ Umling, hynrei haduh mynta katei ka jingkular kam pat urlong.
U Bah Daminot u la bynrap ba ka Association kam shym la shongthait ban buddien ïa kane ka jingdawa, bad ha ka jingïakynduh kaba khatduh bad ka sorkar, hadien ka jingap khmih lynti kaba la bun snem, ka kynhun ka la pyntip ba ka la dep ruh ban shim wai ïa ka jaka kaba heh 1.5 akar ha ki thaiñ Umling na ka bynta ban buh ïa katei ka Quarantine Check Post.
Hynrei, u la pynpaw ïa ka jingsngewsih bad ka jingbym sngewïahap hadien ba ha ka jingïalang kaba la khot da u Deputy Commissioner, na ka liang jong ka tnad Veterinary la pyntip ba katei ka jaka kaba 1.5 akar kam dei na ka bynta ki syiar, hynrei ka dei tang na ka bynta ban peit ïa ki masi, katba ïa ki syiar pat ka Association kan dang hap ban wad da kawei pat ka jaka.
Kane ka jingjia ka la pynlong ïa ka Association ban pynpaw ïa ka jingbym sngewhun bad ka jingsngewsih halor ka jinglong jingman jong kane ka kam, da kaba kynnoh ba ka sorkar kam shym la pynurlong ïa ki jingkular kiba la ai ha ka kynhun. U la maham ruh ba ka jingnang saphriang jong ki jingpang na ki syiar kiba wan na shabar ka jylla ka la long ka jingeh kaba khraw, ym tang ïa ki nongri syiar hapoh ka jylla hynrei kaba lah ruh ban buh jingma ïa ka koit ka khiah jong ki paidbah kiba bam ïa u doh syiar.
Ha kaba kut, u Bah Daminot Sylliang, kum u President jong ka Association, u la pynpaw ba lada ka sorkar kam shimkhia ban pynurlong noh ïa kane ka jingdawa, ka kynhun kan hap ban hiar hi sha surok ban pynlong ïa ka jingpeitngor bad jingjurip ïa ki syiar kiba wan na shabar ka jylla, khnang ban ïarap ban tehlakam ïa ka jingwanrah bad jingsaphriang jong ki jingpang namar la ioh jingtip ba kine ki syiar ki ju ïaid haka por mynmiet bad shuwa ban kynjat shai.
U la dawa ruh ïa ka sorkar jylla ban pynsted noh ïa ka jingpynïoh ïa ka Quarantine Check Post kaba kyrpang na ka bynta ki syiar kiba wan na shabar ka jylla, khnang ban ïada ïa ki nongri syiar bad ban pynthikna ïa ka jingshngaiñ jong ki paidbah nongbam doh syiar ha Meghalaya.