Nalor ki 1000 ksing bad 300 ngut ki nongshad yn ïashimbyntalang ki Garo na kiwei ki jaka

Shillong, Naiwieng 11 : U Myntri Rangbah ka Jylla, u Conrad K. Sangma, hynne ka sngi Balang u la plie paidbah ïa ka jingrakhe Jubili Ksiar jong ka 100 Drums Wangala Festival kaba long ha Wangala A’dam, Chibragre, Tura.
Ha kane ka sngi la donlang ka Mehtab Chandee A. Sangma, MLA ka Gambegre, ki MLA na ki constituency bapher bapher, u CEM jong ka GHADC, ki MDC, ki nongïalam niam bad ki heh sorkar nalor ki bor pynïaid jong kane ka tamasa.
Haba kren ha ka jingïalang, u Myntri Rangbah u la pynpaw ïa ka jingsngewkmen ban ïashim bynta ha kane ka tamasa kaba heh tam jong ki A’chik, kaba mynta ka dap 50 snem bad ai burom ruh ïa u nongïalam ba la khlad noh, u (L) P.A. Sangma, uba la don ka jingangnud ban kyntiew ïa ka tamasa Wangala na ka 100 ksing sha ka 1,000 tylli ki ksing.
“Kane ka pynlong ïa nga ban dap da ka jingsngewkmen kaba khraw ba la lah ban pynurlong ïa ka jingthmu jong u (L) P.A. Sangma da kaba rakhe ïa ka Golden Jubilee bad 1,000 tylli ki ksing,” u la ong.
U la kynmaw ruh ïa ki nongsdang ïa kane ka tamasa ha u snem 1976, kynthup ïa u (L) Captain A. Sangma, (L) Sanford K. Marak, (L) Dr. Bernard K. Marak bad kiwei kiwei. U la ong ba ka Sorkar kan ai burom ïa kine ki nongïalam kiba la noh synñiang ban pynneh pynsah ïa ka kolshor jong ki A’chik.
U la ong ruh ba katba ka Jylla ka dang kiew ha ka roi ka par, ka long kaba donkam ban pynneh ïa ka jinglong kyrpang, ka kolshor bad ki tynrai jong ki.
“Ïa kane ka dei ban ñiew kum ka jingithuh ïa ngi. Ngi dei ban pynneh, kyrshan, ïarap bad sngew sarong ïa ka,” u la ong.
U pyntip ba ka Sorkar ka la mang 20 klur tyngka lyngba ka tnad PWD ban kyntiew ïa ka Wangala A’dam bad sa 6 klur ban kyrshan ïa ka jingpynlong ïa kane ka tamasa. U ong ba ka Sorkar ka la mang ruh pisa ban kyrshan ïa ka jingpyrshang ban rung ha ka Guinness World Records.
Kane ka jingrakhe Golden Jubilee ka la sdang naduh hynne ka sngi ka 11tarik Naiwieng bad kan neh haduh ka 14 tarik Naiwieng 2026, hapoh ka phang pdeng “Rhythm of 1,000 Drums”. Ha kane ka tamasa yn ïashim bynta 1,000 ngut ki nongtied ksing bad 3,000 ngut ki nongshad.
Ki prokram kin kynthup ïa ka Rugala, Cha’chat So’a, ki jingïalehkai tynrai, ki jingïakop rwai, ki jingbam tynrai bad ki jingïapyni ïa ki mar shna kti.
Ka prokram kaba saw sngi kan kynthup ïa ka jingshad bad jingsawa jong ki 1,000 tylli ki ksing, Rugala, Cha’chat So’a, ki jingïalehkai tynrai, ki jingïakop rwai, ki jingïathuh khana tynrai, ki jingbam tynrai bad kiwei kiwei ki prokram kolshor.
Ki kynhun ba la khot sngewbha na ki jaitbynriew Garo kiba shong ha Assam, Nagaland, Tripura, Karbi Anglong bad kiwei ki jaka marjan kin ïashim bynta lang.
La khot sngewbha ruh ïa ki kynhun na ki jaitbynriew Ruga, Chibok, Megam bad Atong.
La khmih lynti ruh ba ki heh sorkar bad ki nongwan jngohkai na India bad na shabar ri kin wan sakhi ïa kane ka jingrakhe kaba kyrpang. La thmu ruh ban buh palat 300 tylli ki jaka ban pyni bad die ïa ki tiar tynrai.