Jowai, Naiwieng 12: Ka Evergreen SC bad ka Ummulong SC ki la jop ïa la ki jong ki jingïakhun jong ka lympung ‘Hajan Shylla Memorial Football League 2026’ kaba dei ka ‘First Division’ bad ka ‘Super Division’ kaba la tip kum ka ‘Kesilroy Memorial Football League 2026’ ba la long hynne ka sngi Palei (12 tarik u Naiwieng 2026)
Baroh ar tylli ki lympung la pynïaid daka Thadlaskeiñ Sport Association (TSA) ha Wahiajer Multi Sports Complex Stadium.
Ka Evergreen SC ka la pynjemkhnap ïa ka Bamkamar SC da kaba thep haduh 7-0 kol ha ka Quarter final jong ka First Division. Lai ngut ki rangïalehkai jong ka Evergreen SC ki la ïoh ban pynkhihjar mar ar sien, kata u Kitbok Phawa (22 & 70’), u Felixson Bang (61 & 67’) bad u Robert Syngkon (74 & 76’). U Teddyson Bang u la thep ïa ka kol ba nyngkong eh haka minit ba 16 jong ka kylla step.
Haba phai sha ka jingïakhun jong ka Super Division, la sakhi ïa ka Ummulong SC kaba la jop da 4-3 kol pyrshah ïaka Nongkhroh Krem Kum. U Lamphrang Dkhar u la long u nongïalehkai ba kongsan tam jong ka Ummulong, ha kaba u la thep hat trick ha ka minit ba 32, 41 bad 70, katba u Hamjngai War u la thep ïa ka kol ba nyngkong haka minit ba 21. Katba ka Nongkhroh Krem Kum la thep da u Badap Lawai (50’), u Anthony Mynsong (52’) bad u Andy Kmah haka minit ba (86’).
La pyntip ba ka jingïakhun Quarter Final jong ka First Division ha kane ka sngi Thohdieng (13.11.2026) kan long hapdeng ka Khliehtyrshi SC pyrshah ïaka Niriang SC haka por 10:30 baje mynstep.
