Shillong, Naiwieng 12: Ka Shillong Lajong FC kan khreh ban ïakhun ïa ka jingïalehkai kaba ar hala ïing ha ka Indian Football League 2026–27 pyrshah ïa ka Sreenidi Deccan FC ha kane ka sngi Thohdieng ha SSA Stadium ha ka por 6:30 baje janmiet.
Kane kadei ruh ka jingïakhun hapdeng ki arliang mamla kiba la pyndep ha ka kyrdan ba ar bad balai ha ka samoi ba ladep jong ka IFL.
ïa kane ka jingïalehkai yn pyni live ha DD Sports bad ruh ha Unite8 YouTube Channel, Zee5 bad WAVES App.
Baroh arliang kin jam sha kane ka jingïakhun khlem shah rem hadien ar tylli ki jingïalehkai ba nyngkong, bad ki la khur saw poiñ, kaba pynlong ïa kane ka jingïakhun ka kabu kaba kongsan ban pynskhem ïa ka kyrdan jong ki ha ka thup jingkheiñ jong ka lympung.
Ka Lajong ka la sdang ïa ka samoi da ka jingjop kaba da 1-0 kol pyrshah ïa ka Mohammedan SC ha Kalyani Stadium, nangta ka la ïakhaid mar 1-1 kol bad ka Chanmari FC ha la ïing. Kumta ka Lajong kan kyrmen ban wanphai biang sha ka lynti jong ka jingjop bad pyndonkam ïa jingkyrshan jong u paidbah sha ka jingmyntoi ban khur pura ïa ki lai point.
Ka Sreenidi Deccan ruh ka la sdang ha ka rukom kaba bha ïa ka samoi, da kaba khur ïa ka jingjop pyrshah ïa ka Rajasthan United shuwa ban ïakhaid pyrshah ïa ka Real Kashmir. Kumta kane ka kynhun ruh kan wan sha Shillong da ka jingsngew skhem ban bteng ïa ka jingïakhun kaba khlem shah rem.
Haba kren hashwa ka jingïakhun, u coach ka Shillong Lajong u Birendra Thapa u la ong, “Ngi khmihlynti ïa ka jingïakhun kaba jwat pyrshah ïa ka Sreenidi Deccan. Ka dei ka kynhun kaba biang bor bad ka don ki rangïalehkai kiba tbit, bad ngi tip ba ngi hap ban long kiba la janai bha ha baroh kawei ka jingïalehkai”.
“Ngi la sdang ha ka rukom kaba bha ïa ka samoi, hynrei ki dang don ki bynta kiba ngi donkam ban pynbha. Ki nongïalehkai ki la trei shitom ha ka por kilanmet, bad ngi pynleit jingmut ha ka jingpynkhreh ba bha, ban long kiba ryntih bad ban ai ïa ka jingïalehkai kaba bha tam jong ngi. Ban ïalehkai hala ïing kan ïai long kaba kyrpang, bad ngi kyrmen ban pyndonkam hok ïa ka jingkyrshan jong u paidbah,” u la bynrap.
Na ka liang jong u rangïalehkai ba shakhmat ka Lajong, u Everbrightson Sana Mylliempdah, haba pynpaw ïa ka jingsngew jong u halor kane ka jingïakhun u la ong, “Ngi khmih lynti bha ïa kane ka jingïakhun. Ka Sreenidi Deccan ka dei ka liang pyrshah kaba khlain bor, hynrei ngi sngewskhem haka jingpynkhreh jong ngi bad ha kaei kaba ngi lah ban ïoh kum ka kynhun. Ngi tip haduh katno kine ki lai point ki long kiba kongsan bad ngin aiti lut baroh ha madan. Ban don ki nongkyrshan ha lyndet jong ngi ka ai mynsiem shuh shuh ïa ngi, bad ngi kyrmen ban pynkmen ïa ki da ka resol kaba bha.”
Baroh ar liang kin kyrmen ban pynneh pynsah ïa ka rekod khlem shah rem jong ki bad ban kiew kham shakhmat ha ka thup kyrdan jong ka league.
ïa kane ka jingïalehkai yn pyni live ha Unite8 Sports bad Doordarshan Sports Network, kumjuh ruh ha OTT platforms WAVES bad ZEE5, Unite8 Sports YouTube channel.
