Dei bym shimkhia ka sorkar Meghalaya bad District Council ba kam jubor ka Assam ïa ka Nongwah Mawtamur, kynnoh ka CORP

Nongpoh, Lber 23 : Ka Confederation of Ri-Bhoi People (CORP) central body mynta ka sngi kila leit ban kynduh kyrkieh ïa ki paidbah nong shong shnong ha Nongwah Mawtamur shwa ban poi ka jing pyn beit pud ha ka wat ka ba ar, hadien ba ka seng ka la ioh sngew ba ka sorkar ka la rai ba ka nongwah mawtamur kan ngat sha Assam ban wad ïa ki jing shisha na ki paidbah nong shong shnong ka ba don kumba 15 tylli ki shnong ha Nongwah Mawtamur.
Ha katei ka jingleit kynduh jong ka seng naka liang ki paidbah kila sei pynban ïaki kot ki sla ban pynshisha ba ki dei ki nong Meghalaya naduh ki snem 1967 ryngkat ki dulir jaka, ha kaba wat ïaka EPIC, ki skhim sorkar ruh ki dei naka jylla Meghalaya.
“Ka jing kam jubor jong ka sorkar Assam ïa ka Nongwah Mawtamur ka dei ba ka Sorkar Meghalaya lane ki bor District Council kim shim khia naduh myn shwa, ki paidbah nong shong shnong ki juh pyrshah barabor ïa ki bor ka Assam hynrei tang shi shnong kim lah ban leh eiei lada ka sorkar kam shim khia, wat katta ruh ki paidbah nong shong shnong ki dang shanñiah beit ha kane ka sorkar ba mynta ban lum ban lang ïaki sha Meghalaya, ki shnong ki don ïa ka lum jingtep, lum balang bad khlaw Shnong” la ong u Bah Bandari President ka CoRP.
Kaba sngew sih ka long ba wat u local MLA ka Jirang u Bah Sosthenes Sohtun u ong ba ka Nongwah Mawtamur ka la hap sha Assam la pyn shai da ki paidbah hakhmat ki nongïalam seng bad kila pyn shisha ruh baroh ki jaka la register ha Hima Sohiong.
Naka liang ka seng ka kyntu ïa ka sorkar ba ka dei ban bishar bñiah bha na ki kot ki sla ryngkat ki nongïalam shnong nongïalam hima, ym ban sngap da ka jingrah kti jong ki briew ki bym dei khasi kiba shong ba sah ha katei ka thaiñ, khnang ba kan nym mih kano kano ka huri hura bad ka jingkulmar hadien habud.