Da ka drama surok ‘Street Play’ la pynlong ha ïew Khliehriat kum ka jingrakhe ïa ka World Tuberculosis, 2023
Khliehriat, Lber 23 : Kum shibynta ïa ka jingrakhe ïa ka World Tuberculosis Month, kaba baroh shi bnai, ban pynshai sha ki paidbah ïa ka jingpang TB lane ka Tuberculosis, ka ophis jong ka District Tuberculosis Society, Jaiñtia Hills, mynta ka sngi ka la pynlong da ka drama surok lane ka Street play ha ïew Khliehriat.
La pynkut ruh ïa ka drama da ka jingshim jingkular lane ka pledge ba dei ban weng noh ïa ki jingsngew sheptieng ïa ka jingpang Tuberculosis, ban weng noh ïa kano kano ka jingpeit poh ne peit ibeiñ ïa kiba don ïa kane ka jingpang, kumjuh ruh ban don ka jingthmu ban weng noh shi syndon ïa kane ka jingpang na ka ri India kata haduh u snem 2025.
U Senior Technical Laboratory Supervisor (STLS), Khliehriat Tuberculosis Unit, u bah . W. Siangshai, ha ka jingkren jong u ha kane ka sngi, u la ong ba kane ka jingpang Tuberculosis, ka dei ka jingpang kaba wan na ki jait khniang bacteria, kiba la tip kum ki Mycobacterium Tuberculosis bad ki long kiba iabit bad kiba saphriang lyngba ka lyer, kata lada don u briew uba don ïa kane ka jingpang TB lada um shim khia ban shim ïa ki jingsumar, ka lah ban saphriang sha kiwei pat lyngba ka jyrhoh, ka synriah, u kyntu ïa ki paidbah ba ka long kaba donkam ban phah leh ïa ka TB test, lada don kano kano ka dak jong kane ka jingpang, u kyntu ruh ban leh khuid, ban bam ïa ki jingbam kiba tei ïa ka met.
U Senior Treatment Supervisor (STS), Khliehriat Tuberculosis Unit, u bah L. S. Manner, u la kren shaphang ki dak (symptoms) kiba paw shabar jong kane ka jingpang Tuberculosis, la ong ruh ba lada don kiba don ka dak ka shin jong ka jingpang, kum ka jyrhoh kaba la neh haduh ar taïew, ka jingpang shit, ka jingmih syep mynmiet, ka jinghiar ha ka jingkhia, ka jyrhoh snam, ka jing bym don ka jingsngew thngan, ki dei ban leit phah test noh kham kloi sha kino kino ki jaka ai jingsumar jong ka sorkar, kiba don hajan kum ki Government Health Centre, Civil Hospital, CHCs, PHCs .
La ong ruh ba kane ka jingpang Tuberculosis, ka dei ka jingpang kaba lah ban pynkoit lane kaba lah ban sumar, lada ki nongpang ki shim khia ban dih ïa ki dawai bad ban bud ïa ki jingbthah jong ki doctor.
U la ïathuh ruh ba kito ki nongpang kiba dang don hapdeng ka jingshah sumar, ki lah ban ïoh jingkyrshan da ka pisa T 500 tyngka man la u bnai na ka bynta ba kin thied ïa ki jait jingbam ki ba tei ïa ka met ba kin dup koit kloi na kane ka jingpang.