Kyntait tyngeh ka JAC ïa ka jingtyrwa u Myntri Tourism ban leit peit Ropeway sha Shimla

By Mawphor Editor On Nov 13, 2026

Shillong, Naiwieng 12 : Ka Joint Action Committee (JAC) ka la kyntait ïa ka jingtyrwa jong ka Sorkar Jylla ban ïalam ïa ki dkhot jong ka Committee sha Shimla bad Sikkim ban leit peitkai ïa ki projek Ropeway ha kitei ki jylla.
Halor kane, na ka liang ka President jong ka JAC, ka Kong Deborah Marbaniang, ka la ong ba ka jingïakhun kaba kongsan jong ka JAC ka long ban ïada ïa u Lum Shyllong, uba long ka tyllong um bad ka bynta ba kongsan tam ïa ka nongbah Shillong.
Ka la ong ba ka Sorkar ka dei ban sngap ïa ka sur jong ki longkmie bad ki paidbah kiba pyrshah ïa ka projek Ropeway namar ka jingsngewkhia ban pynneh pynsah ïa u Lum Shyllong.
Haba kren halor ka jingtyrwa ban leit jurip ïa ki projek Ropeway ha Shimla, ka Kong Deborah ka la ong ba ka JAC kam don jingthmu ban leit sha kitei ki jaka namar ba ki jinglong jong ka mariang ha Meghalaya ki pher bak-ly-bak na kiwei pat ki jylla.
“Ngi ong ïa u Myntri Tourism, Bah Paul Lyngdoh, ba ngim kwah satia ko Bah Paul Lyngdoh ban leit peit ïa ka Tourism Ropeway sha Shimla ne shaei shaei ruh namar ngi ka JAC ngim dei ki briew ba beij, katba shu ong ba u ma u ngin ïa ngeit beit, ban leit kai ban leit shata shata. Phim lah ban nujor ïa kata ka Shimla bad ka ri Meghalaya, ka ri Meghalaya ka ïapher ha baroh ki liang namar u Lum Shyllong u dei uba ai bam, ai um ïa ka sor Shillong baroh kawei, u ai ka bording, lada pynjot ïa u Lum Shyllong, ka Shillong ka la kut” ong ka President JAC.
Haba kylli la ka JAC kan leit ne em ban shim bynta ha ka jingjurip ïa ka jaka treikam jong ka Ropeway, ka Kong Deborah ka la buh jingkylli halor ka jingmyntoi jong kane ka jingjurip. Katkum ka jingong jong ka, kawei na ki tyllong um kaba don hajan ka jaka Ropeway, kaba mynshwa ka tuid bad Tlang bad Lyiur hynrei mynta pat ka la tyrkhong hadien ka jingot ïa ki dieng.
Ka la kam ruh ba katei ka tyllong um mynshwa la pyndonkam da ki kali pynlip ding bad ki kali kit um, hynrei mynta ka la tyrkhong.
Ka Kong Deborah ka la ong ba ka JAC kan bteng ïa ka jingïakhih shong kyllaiñ myngor haduh ba ka Sorkar kan jubab halor ki jingdawa jong ki, da kaba pynkynmaw ba dei ki paidbah kiba thep vote bad thaw pat ïa ka Sorkar.