Amos 5:21 “Nga isih, nga ibeiñ ïa Ki Jingkhawai Niam jong phi, bad ngan ym sngewbha satia ïa ki jingïaseng ba kyrpang jong phi.
U Amos u la mih haka 8th B.C. U prophet uba kren shaphang ka hok jong ki ba duk, namar ki ba riewspah bad ki bakhraw batri, ki Riewniam bad ki Lyngdoh ki la iuhroit ïa ka hok u duk u suk u rangli juki.
Ka Political Condition jong ki Israel kala bamsap, bad kaba pynksan tang ïaki riewspah bad ïaki riew heh kyrdan. Ki lalot ïa ki kyrdan kiba heh haka synshar khadar tang ban ioh klun im im peit peit ïaka bor bad ka burom pyrthei.
Ka Social Condition jong ki Isreal ka long kaba noh tara jur, kaba pynksan ïa kiba riewspah bad kaba ñiew beiñ ïa kiba duk. Kiba duk kim don sur ban dawa wat ïala ka hok jong ki.
Ka Religious Condition jong ki ka long kaba arsap. Ki Lyngdoh bad ki Lebi bad ki Nongthoh, ki pyndep shibun ki jingkñia ainguh, ki pyndep lut ïa ki jingleh ñiam katkum ka hukum u Moses, hynrei ka dohnud jong ki kam don jingïadei bad u Blei.
Khamtam ka jingim ba man la ka sngi jong ki ka long ïa pyrshah bad ka jingshakri jong ki, ki leh riewblei tang haki jingïaseng khawai niam, katba ka jingim pat kaba pyrshah ïaka Mon u Blei.
Kumta, u Blei u la khot kyrpang ïa u Amos ban kdew pyrshah ïa kata ka jinglong jong ki, ba kin tip, ba kin iohi ïa lade, ïala ki jingleh bakla, ha shwa ka jingpynjot kaba un sa wan halor jong ki.
U Blei u la ai ruh ïaki dak jingmaham ïaka balang khristan ha Ri Khasi Jaiñtia, hynrei ym don ba pdiang ïaki ba kidei ki jingmaham jong U Blei. Ka Ri Khasi kaba don khambun ki khristan, ka la dei ban long ka Ri kaba kham bha ha ki liang baroh.
Pynban kat sha ba phai, ngim don jingïapher shuh na ka jinglong jong ki Isreal haki por jong u Prophet Amos. Ha kaba ka synshar khadar kala pyut plak, kaba la dap tang daka jingleh jubor, bad kaba bam sap ha ki liang baroh. Ka imlang sahlang kaba la pynïakhlad kyrdan daka kharai bah ïaki ba riewspah bad ïaki ba duk.
Ka jingmane blei jong ki khristan kala long kham palat ïaki Isreal haka 8th BC. Ki pynlong ïaki jingïaseng bah tang ban pyndep ïaki riti pynïaid kam jong ki balang, ki nongwan jingïaseng ki wan kumba wan haka rynsan ïakop pyni riam. Donbok ba dang don hi katto katne kiba wad shisha ïa u Blei daka dohnud, ba U Blei u dang ai shwa tang ki dak, bad um pat wanrah ïaka jingpynjot jong u. Hynrei kiba bun ki riewngeit ngi long kum ki angel ha iingmane bad kum ki soitan haka jingim ba man ka sngi. Ka jingim jong ngi, kam ju ïadei satia bad ka ktien u Blei. Bun ki Khristan kiba ym lah ban shanñiah ka ki kam ophis, haki kam khaiï, bun ki khristan kiba ym lah ban shanñiah haka synshar khadar bad haka imlang sahlang.
Haba ïakren ïaki kam balang ka jingshyrkhei jong ka politics ka kham jur hapoh balang ban haka sorkar, ki nongïalam ki buh ïalade haki kyrdan kiba halor eh, tang ban ioh pyntreikam ïaki jingthmu shimet jong ki, ym shuh katba kum ka ktien u Blei, ka riti ka long kum ka blei rit, katba ka Bible ka long tang ka subject ïathuh khana ban pynlang briew na rynsan balang. Ki nongïalam balang kiba kham poh kyrdan kim don sur ban ang wat shikyntien ha khmat ki baheh jong ki. Yn nai ïakren shuh ïa kita ki luk ki lak, kim don wat tang haka pali ïakren ruh.
Ngi ong, naka bynta ka burom u Blei, bad haka kyrteng jong ka niam, ngi sher dara pynlong jingïaseng khawai niam kaba remdor, ngi ïa bam ïa dih, ïa khawai dawai sngewbha, katba ka dohnud pat ka jngai na u Blei, ka jingim ba man ka sngi kam ïadei bad ka jingim khristan.
Nalor bala kynriah naka nongrim jinghikai khristan, dang pynksan shuh shuh da kaba ong ba hangno ngi bakla, ïa kita pat kiba kren ïaka jingshisha la kyntait bad la ong ïaki kiba sniew, kiba leh bieij.
To peit noh ki khmat, to iohi noh ïaka jingshisha, to sngewthuh hala dohnud. Ha ki jingïaseng khawai niam, jia ki jingjia aksiden, jia ki eriong ba pyntwa ïaki dara jingïaseng, jia ka jingduh ki bor jingsawa, hap shu pynkut jubor ha mar pdeng ki jingïaseng, jia ka jinghap slap ha ki por mane blei.
Wat la ngi ïa iohi pylleiñ pylleiñ ïa kine ki jingjia, ngim pat ngeit ba ki dei ki jingpynïaid jong U Blei ïaki bor mariang, ïa ki bor jong ki tiar ki tar kiba ngi pyndonkam. Hato ym dei u Blei uba pynhap slap ne u ba pynshai ïaka sngi?
Namar kata te, kumne u ong U Trai ki paid: “To pyrkhat phi ïa la ki lynti. HAGGAI 1:5
To wad ïa u Trai, te phin im; ïoh ba un mih noh kum ka ding ha ka ïing u Joseph, bad ba kan bam duh noh bad ba yn ym don ban pynlip ïa ka ha Bethel. AMOS 5:6
To wad ïa ka ba bha, te ym ïa ka ba sniew, ba phin ïoh im: te kumta u Trai, u Blei ki paid, un long lem bad phi, kumba phi ong. AMOS 5:14 KHB
Amen.
