Pyrshah kiba die dukan bad daju ban pynkynriah ïa ki bus na jaka ïeng kaba ha Ïew Mawlong

Shillong, Naiwieng 12: Kiba die dukan die lang hapoh ïew Mawlong ha ka sngi Palei ki la khang lut ïa ki dukan jong ki ban pyrshah ïa ka jingthmu jong ka Sorkar Jylla ban pynkynriah ïa ki bus kiba la pynïeng lah da ki phew snem ha katei ka jaka bad ban phah shong noh ïa kiba die madan ha katei ka jaka bad ki la pynpaw ba mynta ka jingkhang ïa ki dukan ka dang long tang kumba 70% hynrei lada ka sorkar ka pyneh kin pynjur ki jingïapyrshah kaba lah ban lam sha ka jingkhang ïa ki dukan kaba 100%.
Haba kren sha ki lad pathai khubor ki nongmihkhmat jong kiba die dukan kiba kynthup ïa u Bah Mike Pakyntein bad u Rakesh Gupta kila pynpaw ïa ka jingbym ïahap ïa kane ka jingleh jong ka Sorkar namar kan ktah ïa ka khaïi pateng jong kaba ki la sdang naduh ki snem ba mynshwa.
Ki la ai jingmut ïa ka Sorkar ba kadei ban pynkynriah ïa kiba die madan sha jaka ba don ka Assembly bad secretariat ki ophis Sorkar ba la thmu ban rah sha New Shillong Town Ship
Katba na ka liang ki nongkit mar ne ki daju khasi ki la pynpaw ïa ka jingeh ba mynta lada ka Sorkar kan pynkynriah ïa ki bus kin duh nong namar ka la jngai bad kumjuh ruh kin sa ïoh bylla duna bad shem jingeh ban pyndap ïa ki ïing ki sem.
Ki la pynpaw ïa ka jingsngewkhia ba ka Nongbah Shillong ka mad ïa kiba bun ki jingpyrshah hynrei ki MLA ki dang leit pynsngew bha ïalade sha Europe.
Na ka liang kitei ki nongkhaïi ki la pynpaw ruh ka jingkhuslai ba lada la pynkynriah noh ïa ki bus ka kam khaïi jong ki kan duh bad baroh ki jingpynbha pynitynnad ïa ki dukan bad ki jinglut jingsep ha ka por ba ki la shna pynbha kan sa pynjynjar shuh shuh ïa ki.
Ki la pynpaw ruh ba lada ym shah shuh ïa ki bus ban ïeng ha katei ka jaka kaba ki la pynïeng mynta lah da ki phew snem kam myntoi shuh ruh ïa ki ban treikam khaïi bad die jingdie bad kane kan ktah palat ïa ki briew na nongkyndong ki nongrep kiba ju wan thied wan pet na Ïewduh bad kiba ju pyndonkam ïa kine ki bus ban phah kit ïa ki tiar ki tar, kynthup ruh ïa ki marrep kiba wanrah na ki shnong bad kumjuh kiba dei ban phah kit sha la ki shnong.
Kumta ki la kyrpad ïa ka sorkar ba kan pyrkhat bha bunsien ïa kane ka jingthmu khnang ba kan wanrah ka jingeh hadien habud. Ki la ai jingmut ruh ba ha ka jaka ban phah shong ïa kiba die madan ha kane ka jaka ïeng bus, dei ban phah shong noh ïa ki sha kiwei ki jaka kiba kylluid.
“Kumba ka sorkar ka la thmu ban rah noh ïa ka ophis Meghalaya Legislative Assembly kaba don ha Khyndailad bad ïa ka Secretariat sha New Shillong Township, Mawdiangdiang kumba ka sorkar ka kwah ban pynkylluid ïa ka sor Shillong, ki la kyrpad ïa ka sorkar ba ka dei ban phah noh ban shong ïa kiba die madan ha katei ka jaka hadien ba la dep pynkynriah ïa kitei ki jaka treikam sorkar,” ong kitei ki nongdie dukan ha Ïew Mawlong.