Bym pat aiti u Kontraktor hap shong klas ki khynnah skul ka Sib Sing Govt HSS ha ka ïing skul barim

0

Nongstoiñ, Lber 23: Ïa ka ïing skul ba thymmai jong ka Sib Singh Memorial Government Higher Secondary School kaba don ha Nongpyndeng, la plie da u Conrad Kongal Sangma naduh u bnai Kyllalyngkot jong u snem ba la dep. Hynrei, haduh mynta ym shym pat la ïoh ban pyndonkam.
Ïa kane la lap mynta ka sngi ha ka jingleit jurip jong ki nongïalam jong ka Khasi Student Union West Khasi Hills mynta ka sngi, ha kaba na ka liang u samla Johnfisher Nongsiang president ka KSU West Khasi Hills haba ïakren bad ki nongthoh khubor ha khmat katei ka ïing skul ba thymmai, u la ong ba ka jingleit jurip jong ki ïa katei ka skul ka dei hadien ba ki khynnah skul bad ki kmie ki kpa ki la pyntip sha ka seng ba ki shem jingeh bha.
La ong ba ka building barim ba ki dang shong class, ki don shibun ki kamra klass ba ki jingkhang ïit ki la pait lut. Ha ka por ba slap ka jingpashait ka um slap ka rung hapoh kamra, khamtam ha ka por ba jur ka lyer bad bun ki khynnah skul ki jhieh lut baroh shi rynïeng. Teng teng ki hap ban kup da ki jaiñ jri tang ban lait na ka jing jhieh ka met ka phad.
Ha katei ka jingleit jurip ïa katei ka building skul ba thymmai, la lap ruh ba dang khang tala ïa baroh ki kamra klass. Nangta ki kamra ruh ki dang thylli ym pat don miej, shuki, ben, blackboard ne ki desk. Ka phyllaw ruh lada slap ka lang um bad lada ïeng lain ki khynnah kan ktieh bha bad kin shem jingeh.
Nalor kata baroh swdong jong katei ka skul naduh ka barim haduh kaba thymmai ym don fencing satia. Hynrei ka long open kumto bad ha ki por mynmiet ki briew ki pynlong ïa ka baranda jong katei ka ïing skul kum ka jaka ïa dih kyiad, namar ha rud ka compound jong katei ka skul la lap tang da ki bilor kyiad suda.
Ha kaba ïadei bad katei ka mat, na ka liang ki nongïalam jong ka KSU ki la kyntu ïa ka sorkar ba kan pynbiang noh ïa baroh ki jingdonkam ha katei ka skul. Ban siang bha ruh ïa ka phyllaw khnang ba ki khynnah ki lait na ka jing jaboh ha ka por slap. La dawa ruh ïa ka sorkar ba kan mang pisa na ka bynta ka fencing ïa baroh sawdong jong ka skul, khnang ba ki riew shim kabu ha ka por mynmiet kin ym ïoh lad ban rung laitluid hapoh copmpound jong ka skul.
Hadien katei ka jingleit jurip la leit ban ïakynduh ïa ka kong D.Hoojon Principal jong katei ka skul bad haba kylli shaphang ka jingbym pat pyndonkam ïa katei ka ïing skul ba thymmai, ka la ong ba haduh mynta u Kontraktor u ba tei ïa ka um pat aiti satia ha ki nongpynïaid jong ka skul ym tip na kaei ka daw. Dei namar ka jingbym pat aiti jong u Kontraktor ba ki nongpynïaid skul kim don lynti satia ban pynsngew sha ka sorkar ba kan pynbiang lut ïa baroh ki jingdonkam.

Leave A Reply

Your email address will not be published.