Nongstoiñ, Lber 23: Katkum ka jubab kaba shai hi kaba la pynpaw da u myntri ba thymmai jong ka tnad kam ïalehkai ka Jylla u Bah Shakliar Warjri, u la kren shai hapoh Assembly ba la kyntait lane ‘reject’ ïa ka jingkwah madan phlang plastic lane ‘artificial turf’ jong ki samla ka West Khasi Hills.
Kane ka jubab kaba la shai bha ka la mih ha ka sngi balang hapoh Assembly, hadien ba u MLA jong ka Nongstoiñ Bah Gabriel Wahlang, u la buh ïa ka jingkylli halor ka jingpyntreikam, ka jingpynbha bad ka jingshna ïa ki madan ïalehkai ha kylleng ki District ka Jylla, kyrpang na ka bynta ka West Khasi Hills.
Hashwa ban sa mih noh artad sa ka kyntien madan phlang plastic, u Bah Shakliar Warjri myntri ba dang shu shimti thymmai ha ka tnad ïalehkai jong ka jylla, mar mar hi u ieng ban jubab ba la kyntait ban pdiang ïa ka jingtyrwa. Ka jubab hi ka la kren shai ba ka jingangnud ki samla ban urlong ka madan artificial turf ka long kaba shu kut ha ka jingphohsniew naduh ki snem kiba la dep haduh mynta.
Lah ban pynkynmaw hangne ba u myntri barim ka tnad ïalehkai ka jylla kata u Bah Banteidor Lyngdoh, u la khlei hi dalade ïa ki kyntien ba la pynbna ban pynïoh ïa ka madan ïalehkai madan phlang plastic ha madan NDSA Nongpyndeng.
Ka jingkular ka dei ha u snem 2018 ha ka por ba u wan ban pynhap pyrda ïa ka jingïalehkai final super division football jong ka NDSA. Hynrei, kumba ka paw hi ka jingpynbna ka dei tang ka jingpynbiej ïa ki paidbah Nongstoiñ khamtam ïa ki samla. Ka pynpaw ruh ba na ka liang ki bor ba dei peit bad kumjuh ruh na ka liang ka sorkar, ym shym la don ba shimkhia lem halor kane ka bynta ha kine ki san snem ba la leit.
