Kynnoh MCTA ïa ka sorkar ba ka la thoh biang ïa ka rekod jong ka ïingbishar halor ka skhim penshon

Shillong, Naiwieng 13: Ka Meghalaya College Teachers’ Association ka la kynnoh ïa ka sorkar jylla ba ka la pyrshang ban thoh biang ïa ka jingshisha kaba la dep pynbeit da ka High Court – kaba la pynkhreh ïa ka 2023 Draft Pension Scheme.
Ha ka kyrwoh, ka MCTA ka la jubab ïa ka jingpyntip jong ka tnad pule puthi ha ka 12 tarik u Naiwieng, kaba la ai jingmut ba katei ka draft ka dei tang ka jingtyrwa ba la aiti da ki nonghikai ym ka skhim ba la pynkhreh da ka Jylla.
Ka MCTA, ka nongmudui ha ka WP(C) No. 281 jong u snem 2017, ka la ong ba ka bynta jong ka sorkar ka khyllem haba la tynjuh pyrshah ïa ka rai jong ka ïingbishar jong ka High Court jong ka Meghalaya ha ka 10 tarik u Nailur, 2026.
Ka paragraph 2 jong kata ka rai, ka Association ka la kdew, ka thoh da ki kyntien kiba shai ba la thaw ïa ka Trust bad la pynkhreh ïa ka Draft Scheme da ka Jylla bad la aiti sha ki nongmudui na ka bynta ka jubab bad jingai jingmut jong ki.
Ka jingbud ryntih jong ki jingjia ha ïingbishar, la ong ka MCTA, ka pynskhem ia kane.
Ka Jylla ka la aiti nyngkong eh hakhmat ka High Court ha ka 22 tarik u Lber, 2023 ba kan pynkhreh ïa ka skhim kaba lah ban pdiang da ki nonghikai.Katkum ka jingthaw ïa ka Trust, u nongïasaid aiñ u la aiti ïa ka Draft Rules jong ka sorkar jylla sha ka MCTA ha ka ïingbishar ba plie ha ka 6 tarik u Nailur, 2023, na ka bynta ka jubab bad ki jingai jingmut jong ka.Dei hadien kata ka jingïamir jingmut ba la bthah da ka ïingbishar, ha ka 5 tarik u Risaw, 2023, ba ka MCTA ka la pynphai biang ïa ki jingai jingmut jong ka halor ka state draft sha ka sorkar.
Ka kam kam shym la kut tang hangta.Ha ka 15 tarik u Nohprah, 2025, la shim ba ki nongshah mudui jong ka jylla ki dei ban pyntip katkum ka ain ïa ka skhim penshon, ha kaba ka Kashari ka la shim ba kano kano ka jingpynkylla kan long kum ka jingleh kaba pynsniew ïa ki dkhot jong ka seng nongmudui bad kumjuh ia baroh ki nongtrei jong ka deficit system kiba don hok ban ioh ïa ki jingmyntoi jong ka skhim bad ban bthah ïa ka jylla ban pynbiang baroh bad ban pynbna ïa ka.
Ka MCTA ka la ong ba ka jingpyrshang jong ka sorkar ban shna thymmai ïa ka draft kum ka jingtyrwa jong ka hi ka iehnoh ïa kane ka histori jong ka ïingbishar.
“Ka jingthoh biang ïa ki jingshisha ba la dep buh jingthoh ha ki jingbishar kan ym lah ban pynbeit ïa ki jingeh ba dei hok jong ki nonghikai kiba ïa ka hok jong ki katkum ka Provident Fund right hapoh ka 1969 Act ym lah ban pynkylla marwei khlem ka jingïamir jingmut ba shisha bad ki nongdon bynta,” ong ka Association.
Haba pynpaw biang ïa ka jingkyrshan kaba pura ïa ka Khasi Jaiñtia Deficit School Teachers’ Association bad baroh ki nongtrei deficit ha kylleng ka Jylla, ka MCTA ka la kyntu ïa ka sorkar ban pdiang ïa la ki jong ki rai bad jingpyrshang ha kaba ïadei bad ka 2023 Draft Scheme bad khamtam eh, ban burom ïa ki hukum jong ka ïingbishar High Court.