Shillong, Naiwieng 14: Ka Shillong Lajong FC ka la wanrah ïa ka jingïalehkai kaba itynnad ban pynliem ïa ka Sreenidi Deccan FC da 2-1 kol ha ka Indian Football League 2026-27 ha ka miet sngi Thohdieng ha SSA Stadium.
Ka Lajong kaba ïakhun hala ïing, ka la tehlakam ïa ka bol naduh ba sdang ka jingïalehkai da ka rukom pashat bol kaba janai bad kaba thikna hapdeng madan ba la lamkhmat da u Lamlallian Valphei, u Gladdy Kharbuli, u Damaitphang Lyngdoh bad u Abelson Jachi.
Hadien ka jingïalehkai kaba khlem kol ha ka kylla step, ka Lajong ka la ïoh ba kan lamkhmat ha ka minit kaba 51 lyngba u Joedson dos Santos, uba la pynkhihjar da kaba pynïasoh tiak da ka kjat kadiang ïa ka bol pashat jong u Ephraim Lalremtluanga na ka free kick.
Kane ka kol ka la pynlong ïa u coach ka liang pyrshah u Antonio Rueda, ban wanrah lai tylli ki jingkylla ha ka minit kaba 65, da kaba sei madan ïa u Brandon Vanlalremdika, K Abhijith bad u Nicolas Morinigo ha ka jingpyrshang jong ka ban pynïakhaid. Tang hadien san minit kine ki jingkylla ki la wanrah ïa ka jingmyntoi ha kaba u Jagdeep Singh, rangïalehkai dien liang kamon u la pashat ïa ka bol hapoh box na ka bynta u Morinigo (uba la mih bujli ha ka kylla miet) ban pynkhihjar tiak da ka khlieh kaba la pynïakhaid shipor ïa ka jingïakhun ha ka 72 minit.
Hynrei ka Shillong Lajong ka la lamkhmat biang ïa ka jingïakhun ha ka minit kaba 84 da ka jingpyrshang kaba tyngeh jong u Tremiki Lamurong, bad ka kynhun ka la jam shakhmat ban jop ïa ka jingïalehkai da 2-1 bad khur pura ïa ki lai point.
Ha kaba kut jong ka jingïalehkai u Joedson u la khur ïa ka khusnam Player of the Match.
Kane ka jingjop ka la rah shipor ïa ka Shillong Lajong ha khlieh duh jong ka miej da kaba kamai 7 poiñ na ki lai tylli ki jingïakhun, katba ka Sreenidi Deccan ka la neh ha ka kyrdan kaba saw da 4 poiñ na ki lai tylli ki jingïakhun.
Ka Lajong mynta kan pynkhreh ïa ka jingïalehkai shabar nala ïing ha ka 19 tarik Naiwieng ha Goa pyrshah ïa ka Dempo.
Ki rangïalehkai ka Shillong Lajong kiba la mih madan pyrshah ïa ka Sreenidi Deccan:
Ranit Sarkar (GK) (sub Siwel Rymbai 29′), Joedson Dos Santos, Overkindness L Mawnai, Ephraim Lalremtluanga, Kenstar Kharshong, Lamlallian, Gladdy Kharbuli, Damaitphang Lyngdoh, Abelson Jachi (sub Joao Vitor De Paula Morais 64′), Everbrightson Mylliempdah (sub Nelson Rymbai 64′), Phrangki Buam (sub Tremiki Lamurong 75′).
