Mairang, Naiwieng 12: Ka Deputy Commissioner Eastern West Khasi Hills District Mairang, ka la pyntip sha baroh ki paidbah nongshong shnong jong ka district ba katkum ka ‘Registration of Births and Deaths (Amendment) Act 2026’, ka ba la sdang treikam naduh ka 1 tarik Risaw 2026, ba la pynmih da ka Ministry of Law and Justice, (Legislative Department) jong ka Sorkar Pdeng, ba ka la don ka jingpynkylla ha ka rukom treikam kaba ïadei bad ka jingpynrung kyrteng ïa ka jingkha bad jingïap kaba la slem, kaba la palat ïa ka arsnem naduh ba la kha ne ïap.
Katkum ka Section 13 jong ka Act, lada ka jingkha khun ne jingïap kaba la palat ïa ka arsnem hadien ba la jia, ka donkam ïa ka hukum kaba dei tang na u Judicial Magistrate First Class, ym dei shuh na u Executive Magistrate.
Kumta, baroh ki application kiba thymmai na ka bynta ban register ïa ka jingkha bad jingïap kiba la slem palat ïa ka arsnem, dei ban leit thep beit hakhmat u Judicial Magistrate First Class.
La kyntu ïa ki paidbah ba kin bud bad leh ïa kane ka rukom treikam kaba thymmai kumba la bthah khnang ban pynsuk ïa ki.
