Pynkhreh ka BJP ST Morcha ban rakhe ïa ka taïew burom ïa ki jaidbynriew riewlum ha Meghalaya

Nongpoh, Naiwieng 12: Ka Bharatiya Janata Party (BJP) ST Morcha ka la pynkhreh ban rakhe kyrpang ïa ka Tribal Pride Week ne ka taïew burom ïa ki jaidbynriew riewlum naduh ka 11 tarik haduh ka 18 tarik u Naiwieng 2026 ha ki district bapher bapher jong ka jylla Meghalaya, kum ka dak jong ka jingai burom ïa ki paid riewlum bad ban pynsah jingkynmaw ïa ki synñiang jong ki ha ka jingïakhun laitluid bad ka roi ka par jong ka ri.
Kane ka jingrakhe ka long ruh kum ka dak jong ka jingkynmaw burom ïa ka lyngkhuh sngi kha kaba 151 jong u Dharti Aaba Bhagwan Birsa Munda, uba dei u nongïalam ba pawnam jong ki jaidbynriew riewlum ha ka jingïakhun pyrshah ïa ka jingsynshar phareng.
Ïa kane la pynpaw da u Himanta Timung, President ka BJP ST Morcha, haba kren sha ki lad pathai khubor, ha ryngkat ka jingdonlang ka Kong Wanrika Lyngdoh, General Secretary ka BJP ST Morcha, bad u Kundan Lohar, State Secretary ka BJP OBC Morcha, Meghalaya.
U Himanta Timung u la ong ba ïa ka Tribal Pride Day (Janjatiya Gaurav Diwas) yn rakhe ha kylleng ka ri lyngba ki prokram bapher bapher ban pynpaw ïa ka jingai burom ïa ka pateng tynrai, ki riti dustur, ki kolshor bad ki synñiang jong ki jaidbynriew riewlum ha ka roi ka par jong ka ri.
U la bynrap ba kane ka jingrakhe ha kylleng ka ri ka long hapoh ka jingïalam jong u Myntri Rangbahduh ka ri, u Narendra Modi, ban pynkup burom bad pynsah jingkynmaw ïa ka bynta kaba khraw jong ki jaidbynriew riewlum ha ka histori bad ka jingtei ïa ka ri India.