Ha u bnai ban wan lah ban hiar ka Regional Committee on Border Dispute sha ki shnong khappud
Nongstoiñ, Lber 23: Ka jingthmu jong ka sorkar Meghalaya bad Assam ban sdang biang ïa ka jingïakren pynbeit pud, na ka bynta ki hynriew tylli kiwei pat ki jaka khappud ki bym shym pat la lah ban pynbeit ha ka wat kaba nyngkong, ka lah ban urlong hapoh une u snem kata ha shuwa ka Election ha Meghalaya bad ka MLA Election ha Assam.
Katkum ki tyllong khubor kiba ïajan bha bad ka sorkar, la ong ba hadien ba ka sorkar MDA II ka la pynthymmai ïa ki dkhot jong ka Regional Committee on Border Dispute, ka la pyrshang ban pynbeit ba ki dkhot jong ki ar tylli ki Regional Committee on Border Dispute, kawei ka dei kaba dei ban peit na ka bynta ki jaka kiba hap ha Ribhoi District kaba ïa ka Committee la khlieh da u bah Prestone Tynsong Symbud Myntri Rangbah kum u Chairman.
Nangta ka Committee kaba dei na ka bynta ki jaka kiba hap ha West Khasi Hills, kaba la khlieh da u bah Paul Lyngdoh Myntri ka tnad pynroi sor kum u Chairman, kin sa ïa pynbeit bad ki dkhot jong kitei ki Committee ïa ka por bad ïa ki tarik ba kin leit.
Haba pyrshang ban wad jingtip bniah halor katei ka phang ym shym pat lah ban pynthikna, namar ba ka Assembly Session kam pat kut. Hynrei katkum ka phang ba la ïoh la sngewthuh shai ba hadien ka Assembly Session, ki ar ngut ki Chairman jong ki Regional Committee on Border Dispute, kin sa pyntip sha baroh ki dkhot jong ki Committee, ba kin ïa pynbeit ïa ka por. La sngewthuh ruh ba ka jingleit jurip jong ki Regional Committee ïa ki shnong khappud, ka lah ban long ha u bnai Ïaïong.
Kum ban shu pynkynmaw hangne, ba ka Sorkar Meghalaya ka ladep iasoi ia ka Memorandum of Understanding bad ka Sorkar Assam lyngba ki arngut ki Myntri Rangbah, kata u Conrad Sangma bad u Himata Biswa Sarma ban ia pynbeit noh ia ki hynriew tylli ki jaka kiba kham jwat ha ka jingiakajia pud.
Hynrei ia kane ka MoU la pyrshah da kiba bun halor ka jingkynnoh ba ka Sorkar Meghalaya ka la shu ai ei ia ki jaka jong ka jylla Meghalaya sha ka jylla Assam bad kynnoh ruh ba ka Assam ka kham iohnong ban ia ka Meghalaya.