Nongstoiñ, Naiwieng 11: U Phria u ba la neh haduh shi kynta tam u la pynjulor lut khait ïa u kba u ba don ha ka pyntha kaba kaba heh ba ïar ba la tip kum ka Nongstong ha thaiñ Ri Muliang C&RD Block West Khasi Hills District.
Kane ka jingja ka la jia ha ka shiteng sngi jong ka 10 tarik Naiwieng 2026, ha kaba u phria u ba jur ryngkat u slap bad ka lyer, u la ther naduh ka por 12 baje haduh 1 baje nohphai sngi bad pynjulor jur ïa ki soh kba kiba la hap lut ha madan bad shah kit pat sa ha ka umsaw kaba tuid lyngba ka pyntha kba.
U Bah Bitstarwel Kharbani Sordar Shnong Mawkapiah, u la ïathuh ba ki shnong kiba la shah ktah palat ha kane ka jingjia ki dei ki lai shnong, ba kynthup ïa ka Kyndongngei, Mawkapiah bad Nongrimhill, ha kaba ka jingjulor ka la long kumba 90 percent ei ei. Nalorkata kiwei kiwei ruh ki shnong ba marjan jong katei ka thaiñ kiba rep kba ha katei ka Nongstong pyntha kba ki la shah ktah jur ha kane ka jingjia ther phria.
Na ka liang u Bah Bitstarwel Kharbani Sordar Shnong Mawkapiah, u la ong ba hynne ka sngi 11 tarik Naiwieng 2026, ma u ryngkat bad ki riew rangbah ki la leit ban ai jingtip halor kane ka jingjia ha u BDO jong ka Ri Muliang C&RD Block.
U la ong ba ki paidbah nongshong shnong khamtam ki nongrep ki la diaw mynsiem bha, namar ka jingtrei shitom baroh shi snem la pynjot noh tang ha ka shi kynta. U la ong ba ki nongrep ki da khmih lynti ruh ba ki bor sorkar kin phaikhmat lem, da kaba thaw ki lad ki lynti jingïarap halor kane ka jingshem lanot jong ki.
