Pyllait u Modi ïa ki kot skul bad kot pyntbit Curriculum ba la pynkylla ktien sha 12 tylli ki ktien ka India

Delhi, Naitung, 29: U Myntri Rangbahduh ka ri u Narendra Modi ha ka sngi Saitjaiñ u la plie paidbah ïa ka Akhil Bhartiya Shiksha Samagam ha Bharat Mandapam, Delhi kaba ïahap bad ka jingdap lai snem jong ka National Education Policy 2020. U Modi u la pyllait ruh ïa ka bynta kaba nyngkong jong ka pisa hapoh ka skhim PM SHRI. 6207 tylli ki skul ki la ïoh ïa ka bynta kaba nyngkong ha kaba baroh ka pisa ka long T 630 klur. U la pyllait paidbah ruh ïa ki kot skul bad kot pyntbit kiba la pynkylla sha 12 tylli ki ktien jong ka India. U Myntri Rangbah Duh u la leit ïaid ruh lyngba ka exhibition ba la pyni ha kane ka sngi.
Haba kren ha kane ka jingïalang u Modi u la ban jur halor ka jingkongsan ka jingnang jingstad hapdeng ki bynta kiba lah ban pynkylla ïa ka lawei jong ka ri.
“Ka rukom ai jingnang jingstad jong ngi ka don ka bynta kaba khraw ha ka jingpynurlong ïa ki thong ba ka India mynta ka ïaid,” u la ong.
U la ban jur halor ka jingdonkam jong ka Akhil Bhartiya Shiksha Samagam ha kaba u la ong ba ka jingïamir jingmut bad ka jingïakren ki long kiba donkam na ka bynta ka pule puthi. U la ong ba ka Akhil Bhartiya Shiksha Samagam kaba la dep ka la long ha ka Rudraksha convention center jong ka Varanasi kaba dang shu dep shna bad mynta u snem, ka Akhil Bhartiya Shiksha Samagam ka long ha ka Bharat Mandapam kaba thymmai. Kane ka dei ka prokram kaba nyngkong kaba long ha ka Mandapam hadien ba la plie paidbah ïa ka.
Na ka Rudraksha jong ka Kashi sha ka Bharat Mandapam kaba katkum ka juk mynta, u Modi u la ong ba ka don ka khubor ha ka jingïaid lynti ka Akhil Bhartiya Shiksha Samagam kaba long ka jingpynïahap ïa kaba jyndai bad kaba thymmai. U la ong ba ha kawei ka liang, ki rukom ai jinghikai ha India ki pynneh ïa ki rukom ba hyndai bad ha kawei pat ka liang, ka ri ka dang jam shaphrang ha ka science bad ka teknoloji. U la ai khublei ïa kito kiba la don bynta ha ki kam pule puthi kiba la ïaid shaphrang mynta. U la ong ba kane ka sngi ka dei ka lyngkhuh dap lai snem ka National Educational Policy bad u la ai jingsngewnguh ïa ki riewshemphang, ki nonghikai bad kito kiba don ha ki kam pule puthi kiba la shim ïa kane ka kam kum kaba kyrpang bad kiba la shim ïa la ka bynta ha ka jingïaid shaphrang. U la kren shaphang ka exhibition ha kane ka sni ha kaba u la kdew sha ka jingpyni ïa ki sap, ki rukom ai jinghikai bad ki rukom treikam ba la saindur thymmai. U la kren shaphang ka jingkylla jong ka pule puthi bad ki skul ha ka ri ha kaba ki khynnah mynta ki ïoh jingnang jingstad na ka jingïalehkai bad u ong ba u dap da ka jingkyrmen na ka bynta kane. U la kyntu ruh ïa baroh ba kin leit peit ïa kane ka exhibition.
U la kren shaphang ki kam kiba bun ha ka por ba la plie paidbah ïa ka NEP ha kaba u la ïaroh ïa ka jingtrei shitom jong baroh kiba don bynta ha kane ka jingpdiang ïa ki rukom kiba thymmai. U la ong ba ha ka NEP ki jingnang jingstad tynrai bad ki teknoloji ba thymmai ki dei kiba la ïoh ka juh ka jingpeit bniah. U la kren shaphang ka jingtrei shitom jong kiba don bynta ka jingwanrah ïa ki jinghikai ba thymmai ïa ki khynnah rit bad ki kot ha ki ktien bapher bapher na ka bynta ki jingpule kiba kham halor. U la ong ba ki shah hikai mynta ki sngewthuh ba ha ka jaka jong ka 10+2 mynta ka 5+3+3+4 ka dang treikam. Ka jingïoh jingnang jingstad kan sdang na ka rta 3 snem bad kane ka wanrah ïa ka jingryntih ha baroh kawei ka ri. U la pynbna ruh ba ka kynhun Myntri Sorkar Pdeng ka la ai jingmynjur ïa ka jingwanrah ïa ka National Research Foundation Bill ha ka iing dorbar thaw ain Parliament. Shen kan sa wan ka National Curriculum Framework hapoh ka NEP. Ka rukom treikam na ka bynta ki khynnah kiba hapdeng 3 bad 8 snem ka dei kaba la pynkhreh. Ka ri baroh kawei kan don kawei ka jinghikai bad ka NCERT ka dang pynkhreh ïa ki kot ba thymmai na ka bynta kane. U Myntri Rangbah Duh u la pynbna ba dang pynkhreh ki kot ba thymmai na ka bynta 130 tylli ki sobjek ba ka bynta ki klas 3 haduh 12 ha 22 tylli ki ktien na ka bynta ka jingai jinghikai ha ki ktien tynrai bapher bapher.
U Modi u la ong ba ka jinglehbeiñ kaba jur tam ïa uno uno u khynnah pule ka dei ka jingpeit ïa ki da kaba buh nongrim ha ka ktien ba ki kren ha ka jaka jong ka jingtbit jong ki. “Ka pule puthi ha ka ktien tynrai ka dei ka hok kaba thymmai na ka bynta ki khynnah pule ha India. Ka dei ruh ka sienjam na ka bynta ka hok ha ka imlang sahlang,” la ong u Myntri Rangbahduh.
U la ong ba ki bun bha ki ktien ha ka pyrthei bad ba baroih ki don la ka jingkongsan, hynrei u la ong ba bun na ki ri kiba la kiew shaphrang ki ïoh jingmyntoi bha namar ka jingpyndonkam ïa ka ktien lajong. U la ai nuksa da ka Europe ha kaba u ong ba bun na ki ri ki pyndonkam ïa ki ktien tynrai lajong. U la ong ba watla ka India ka bun ki ktien tynrai kiba la skhem, ïa kine la ïohi kum ka dak jong ka jingsahdien, bad kito ki bym nang ban kten ïa ka ktien phareng ki shah ieh bein watla ki long kiba don sap bad kiba tbit ha ki kam. U Myntri Rangbah Duh u la ong ba namar kane, ki khynnah ha ki jaka nongkyndong ki shah ktah bha. U la ong ba ka ri ka la sdang ban kyntait ïa kane ka jingngeit hadien ka jingwan jong ka National Educational Policy. “Wat ha ka UN, nga kren ha ka ktien jong ka India”, la ong u Modi.
U Myntri Rangbah Duh u la ban jur ba ïa ki sobjek bapher bapher kum ka social science bad engineering mynta yn ai jinghikai ha ki ktien tynrai jong ka India.
“Haba ki khynnah pule ki sngew shngain ha ka ktien, ki sap bad ki jingtbit kin ïaid shaphrang khlem kino kino ki jingpynthut,” la ong u Modi. U la ong ruh ba kito kiba pyrshang ban pynkylla kam sain pyrthei ïa ka ktien ka thylliej kiba don la ki jong ki jing thmu shimet mynta ki hap ban sngap jar. “Ka National Educational Policy kan burom ïa baroh ki ktien jong ka ri,” u la ong
U Modi u la ong ba ngi dei ban tei ïa ka pateng kaba khlaiñbor ha kine ki 25 snem ban wan jong ka Amrit Kaal. Ka pateng kaba lait na ka jingmut jingpyrkhat jong kiba shah synshar ha ki mynder, kiba kwah ban saindur thymmai bad kiba kloi ban wanrah burom ïa ka ri ha ki kam science bad ki kam ïalehkai, kaba kwah ban pyntbit ïalade katkum ki jingdonkam ha kane ka juk mynta, kibadon ka jingbahklieh na ka bynta ka ri. “Ka NEP kan don ka bynta kaba heh ha kane,” u la ong
U la ong ba na ki bynta bapher bapher jong ka jingbha jong ka pule puthi, ka jingtrei jong ka India ka dei na ka bynta ka jingryntih kyrdan. “Ka jingpeit bniah jong ka NEP ka dei ba baroh ki khynnah ka India ki dei ban ïoh ïa kajuh ka jinghikai bad kijuh ki lad ban ïoh jingnang jingstad,” u la ong da kaba bynrap ba kane kan ym sah ha tang ka jingplie ïa ki skul. U la ong ba ka jingbha ka dei ban long ruh ha ki jingdon jingem ha ryngkat ka pule puthi. U la ong ba kane ka mut ba baroh ki khynnah ki dei ban ïoh lad katkum ki jingjied bad ki jingtbit jong ki. “Ka jingryngkat kyrdan ha ka pule puthi ka mut ba ym don uno uno u khynnah u bym ïoh jingpule namar ka jaka sah, ka kyrdan ne ka niam,” u la ong. U la ong ruh ba ïa ki hajar tylli ki skul yn kyntiew hapoh ka skhim PM SHRI. “Ha ka juk jong ka 5G, ki skul PM- SHRI kin long ki lad na ka bynta ka pule puthi katkum ka juk mynta,” u la bynrap. U la kren shaphang ki skul Eklavya ha ki shnong rilum, ka internet ha ki shnong bad ki khynnah kiba ïoh jingnang jingstad lyngba ka DIKSHA, SWAYAM bad Swayamprabha. “Mynta, ha India, ïa ki jingdonkam na ka bynta ka pule puthi dang pynbiang wut wut”, u la ong.
U la kren ruh shaphang ki sienjam ban pynïasoh ïa ki jinghikai ban ïoh kam bad ka pule puthi bad ki rukom trei ban kham pynsngewtynnad ïa ka pule puthi. U la ong ba mynshuwa ki lad bad ki practical ki don ha tang katto katne ki skul hynrei mynta, lyngba ki Atal Tinkering Lab, palat 75 lak ngut ki khynnah ki ïoh jingnang jingstad ha ka science bad ka jingsaindur thymmai. “Ka Science ka dang pynsuk ïalade na ka bynta baroh. Ki dei kine ki scientist kiba dang khynnah ki ban tei ïa ka lawei jong ka ri da kaba ïalam lynti ha ki projek ba kongsan bad pynkylla ïa ka India sha ka jaka pdeng jong ka pyrthei na ka bynta ki kam wad bniah”, u la ong.
“Kano kano ka jingpynkylla ka donkam ïa ka jingshlur bad ka jingdon ïa ka jingshlur ka ïalam sha ki lad kiba thymmai, la ong u Modi da kaba bynrap ba ka pyrthei ka peit sha ka India kum ka jaka pdeng jong ki lad kiba thymmai.
U la ai nuksa da ka software technology bad space tech bad u la ong ba kam long kaba suk ban ïaryngkat bad ka jingtbit jong ka India. Ha ka jingkren shaphang ka teknoloji ha ki kam ïada ri, u Myntri Rangbah Duh u la ong ba ka rukom treikam ka India na ka bynta ka ‘dor kaba jem’ na ka bynta ki ‘mar kiba bha’ kan long kaba seisoh bha. U la ong ba ka jingburom ïa ka rukom ai jinghikai ha India ka dang kiew ha ka pyrthei kumba kiew ka nam jong ka ri ha ki kam karkhana bad ki startup. U la ong ba ki jingdon ki jaka ai jinghikai ha India ka la kham bun ha ki jingbuh kyrdan bad u la ïathuh shaphang ka jingplie ïa ar tylli ki IIT campus ha Zanzibar bad Abu Dhabi. “Bun kiwei kiwei ki ri ki kyntu ïa ngi ba ngin plie ïa ki IIT campus ha ki ri jong ki,” u la ong.
U la kren shaphang ki skul bah kiba kwah ban plie ïa ki jaka ai jinghikai jong ki ha India namar ki jingkylla kiba bha ha ki kam kiba ïadei bad ka pule puthi. U la ong ba ar tylli ki skul bah jong ka Australia kin sa plie ïa ki jaka ai jinghikai jong ki ha ka GIFT City ha Gujarat. U Modi u la ban jur halor ka jingpynkhlain ïa ki jaka ai jinghikai bad ka jingpynkhreh ïa ki na ka bynta ka lawei. U la ban jur halor ka jingdonkam ban pynlong ïa ki jaka ai jinghikai, ki shuk bah, ki skul bad ki kolej jong ka India kum ki jaka pdeng jong kane ka jingkylla.
U la ong ba “Ka jingtei ïa ki samla kiba tbit ka dei ka jingpynthikna ïa ka jingtei ïa ka ri kaba khlain,” bad ba ki kmie ki kpa bad ki nonghikai ki don ka bynta kaba heh ha kane ka kam. U la kyntu ïa ki kmie ki kpa bad ki nonghikai ba kin pynkhreh ïa ki khynnah pule kiba wad bniah bad kiba ïar ka jingmut jingpyrkhat. “Ngi dei ban peit ïa ka lawei bad pyrkhat na ka bynta kane. Ngi dei ban pyllait ïa ki khynnah na ka jingban khia ki kot skul,” u la ong.
U la ong ba ka jingphaikhmat ka pyrthei sha ka India ka wanrah ïa ka jingbahkhlieh. U la ong ba ki khynnah ki dei ban sngewthuh ïa ka jingdonkam ïa ka Yoga, Ayurveda, ka jingsaindur bad ka thoh ka tar. U la pynkut da kaba pynkynmaw ïa ki nonghikai shaphang ka jingkongsan jong kine ki khynnah pule kiba mynta ha ka jingïaid lynti ka India sha ka ‘Viksit Bharat’ ha u snem 2047.
U Myntri Sorkar Pdeng ba dei khmih ïa ki tnat Education bad Skill Development and Entrepreneurship, u Dharmendra Pradhan u la ïadon lang ha kane ka sngi ha ryngkat kiwei kiwei ki heh ki hain.