Na ka jingbymtreikam ki polisi sha ka Viksit Bharat: Ka juk u Modi ka la pynkylla thymmai ïa ka India (Piyush Goyal)

By Mawphor Editor On Jun 14, 2026

Ka India ka la kiew shaphrang naduh u snem 2014. Ka ïoh ka kot jong ka kala kham khlaiñ, ki jingdon jingem ki la kham kham bha, ki kynthei ki kham shah pynkupbor, ki nongrep ki ïoh ïa ka dor kaba kham bha, bad kiba duk ki la kham shngaiñ. Kane ka jingkylla ka don kawei ka phang kaba ïadei: Ka jingthmu bad ka jinglong nongïalam jong u Myntri Rangbahduh u Modi.
Ki briew ka India ki la ïalum lang ha lyndet ka jinglong nongïalam ba don ka jingïohi jngai bad ka jingsngewlem jong u ban pynlong ïa u, u Myntri Rangbahduh ba la slem tam jong ka ri ha ka 10 tarik u Jylliew, haba u la pyndep 4,399 sngi ka jingshakri ïa ka ri, kaba la tam ïa ka samoi jong u Jawaharlal Nehru hadien ka jingjop elekshon ba nyngkong jong u.
U mawmer ba kongsan kadei ka por ha ka jingïaid lynti jong ka India ha ka synshar paidbah. Ka ri ka la jied da kaba kut jingmut ïa ka Sorkar Modi ban synshar ha u snem 2014 ha ka por ba ka ïoh ka kot ka dang hiar bad ka jingngiah jong ki paidbah ka la nang kiew namar ka jingbym treikam ki polisi, ka jingbamsap, ki jinglehraiñ kiba la synshar ïa ka sorkar UPA kaba la jah burom.
Ka jinglong nongïalam kaba don jingsngewlem – Ka ri ka la don ha ka jingïaid lynti jong ka jingkylla naduh u snem 2014. Ka sorkar Modi ka la pynthikna ka jingïoh ei ïa ki mar bam na ka bynta palat 81 klur ngut ki briew, ka la plie lad ïa ka jingkynthup lang ïa baroh ha ka kam pisa lyngba ki 58 klur ki Jan Dhan bank accout, bad ka la pynbiang ia ka jingpyniasoh um kor sha 16 klur tylli ki longïing. Lyngba ka Ayushman Bharat, ka skhim insurance ha ka koit ka khiah kaba heh tam ha ka pyrthei, 12 klur tylli ki longïing ki ïoh ïa ka jingsumar ei haduh T.5 lak.
Na ka bynta kiba bun ki samla jong ka India, ka lah ban long kaba eh ban mutdur haduh katno ka jingim ka long kaba eh shwa ki jingkylla kiba wanrah jingkylla ba u la sdang, nyngkong kum u Myntri Rangbah jong ka Gujarat bad hadien kum u Myntri Rangbahduh. Ka jinglong nongïalam kaba kut jingmut jong u, ryngkat bad ka rukom treikam kaba pyrkhat bad kaba sngewlem, ka la ïalam ïa ka India sha ka thong Viksit Bharat 2047, kaba pynïasoh ïa ka jingsngew sarong ïa ka pateng jong ka India bad ka jingthmu pynroi kaba kut jingmut.
Nari Shakti
Na ka bynta u Myntri Rangbah duh, ki kynthei kim dei tang ki nongïoh jingmyntoi na ki jingïarap, hynrei ki nongtei ïa ka ri. La pynbeit shwa ïa ki nongrim: palat 12 klur tylli ki paiñkhana la shna hapoh ka Swachh Bharat Mission, kaba kyntiew ïa ka jingshngaiñ bad ka burom, katba palat 10 klur tylli ki jingpynïasoh LPG khlem jingsiew la pynbiang hapoh ka Ujjwala Yojana, kaba pyllait ïa ki kynthei na ki jingma jong ki kamra shet ba dap da ka tdem.
Ka sienjam Beti Bachao, Beti Padhao ka la pynskhem ïa ka jingdonkam jong ka jingnang jingstad bad ka bha ka miat jong ki khynnah kynthei. Lyngba ka Nari Shakti Vandan Adhiniyam, u Myntri Rangbahduh u la pynïoh ïa ka bhah kaba kham heh ïa ki kynthei ba kin long ki nongmihkhmat bad ki nongïalam ha ki ïingdorbar thaw aiñ jong ka ri ban pynïaid shakhmat ïa ka roi ka par ba ïalam da ki kynthei.
Ka bha ka miat jong ki Nongrep
Ka bha ka miat jong ki nongrep ka la long ka nongrim ba kongsan jong ki polisi jong u Myntri Rangbahduh u Modi. Lyngba ka Pradhan Mantri Kisan Samman Nidhi (PM-KISAN), la phah bei beit ïa ka jingkyrshan ha ka ïoh ka kot sha ki klur ngut ki nongrep kum ka jingithuh ïa ka jingnoh synniang jong ki. Haduh 10 klur tylli ki longïing jong ki nongrep ki la ïoh jingmyntoi na palat T. 4.28 lak klur ba la siew hapoh kane ka skhim.
Ka sorkar ka la kyntiew ruh ïa ka Minimum Support Price, kaba mynta ka long ym duna ïa ka 1.5 shah ka jinglut jingsep. Kumjuh ruh, ki nongrep ki la ïoh jingïada na ka jingkiew ki dor jong ki sboh ha ka pyrthei lyngba ka jingbteng ban ïoh ïa ki nutrient na ka bynta ki jingthung ha ka dor kaba duna.
Ki lad ki lynti na ka bynta ki samla
La saiñdur ïa ki sienjam ba kongsan kum ka Make in India bad ka Startup India ban plie lad ïa ki samla jong ka ri. Ka jingsdang ïa ka Tnad Skill Development and Entrepreneurship ka la ïarap ban pyntbit ïa ki samla da ki sap kiba ïadei bad ka ïoh ka kot jong ka juk mynta, katba ka buh ïa ka India ha ka kyrdan ban shim kabu ïa ka jingkylla kaba dang mih ha ka Artificial Intelligence.
Ka Startup India, ryngkat bad ka jingkyrshan kaba kham ïar na ka bynta ka kam saiñdur thymmai, ka la plie lad ïa kiba bun ki samla ban kylla na ki nongwad kam sha ki nongthaw kam. Kine ki sienjam ki buh ïa ka nongrim na ka bynta ka jingkylla kaba thymmai jong ka jingseng kam seng jam kaba don ka lad ban noh synniang shibun sha ka jingkiew ka ïoh ka kot bad ka jingpynmih ki lad ïoh kam.
Ka ïoh ka kot bad ka rukom im kaba kham suk
Shwa u snem 2014, la jukheiñ ïa ka India kum kawei na ki “Fragile Five” ha ka pyrthei, ha kaba ka jingshaniah jong ki nongbei tyngka ka la nang hiar. Lyngba ki jingpynkylla kiba shlur, ki polisi kiba ïadei bad ki nongbei tyngka, ka jingpynïaid ïa ka pla tyngka bad ka jingpynduna ïa ka jingkiew dor, ka India mynta kadei ka ri kaba kiew stet tam ha ka pyrthei bad ka jaka kaba khring na ka bynta ka kam khaïi pateng bad ka jingbei tyngka.
Ka India ka la ïasoi ïa Free Trade Agreement bad ki ri kiba la kiew, kaba plie lad ïa ki samla jong ngi, ki nongrep, ki kam barit baria, ki nongtrei kti bad ki nongtrei khlem da pynduh ïa ka jingmyntoi jong ka India, ym kum ki katto katne ki jingïateh kiba khlem pyrkhat bha ba la ïasoi da ka UPA.
Ka sorkar ka la pynskhem ruh ïa ka jingshaniah jong ki nongkhaïi bad ki briew kiba pdeng ka ïoh ka kot lyngba ki jingpynkylla kiba heh, kynthup ïa ka Goods and Services Tax bad ka jingpynhiar ïa ka khajna. Ka sienjam Digital India, ryngkat bad ka jingïar sted jong ka jingïoh internet bad ki rukom siew lyngba ka lad digital, ka la ktah shibun ïa ka ïoh ka kot katba ka pynsuk ïa ka jingim ba man la ka sngi jong ki nongshong shnong.
Ki kam khaïi pateng ki la ïoh jingmyntoi shuh shuh na ka jingweng ïa ka jinglong beaiñ ïa ki kam kiba bun kiba la rim bad kiba rit, bad kumjuh ruh na ka jingpynduh ïa ki jingban khia jong ka jingbud ryntih ki bym donkam. Ki briew kiba pdeng ka ïoh ka kot ruh ki la ïoh ïa ka jingpynlait kaba khraw, ha kaba ïa ka jingkamai kaba shisnem kaba haduh T.12.75 lak la pyllait na ka income tax.
Ki jingdon jingem katkum ka juk mynta
Ka sorkar Modi ka pynkylla stet ïa ki jingdon jingem jong ka India. Ka jingdon jong ki kad liengsuiñ kiba treikam ka la kiew palat ar shah, da kaba kiew na ka 74 tylli ha u snem 2014 sha ka palat 160 tylli.
Ka jingpyndonkam kaba ïar ïa ka bording ha ki lynti rel, ka projek bullet train, bad ka jingpynïar stet ïa ki surok bah bad ki expressway jong ka ri ka la pynlong ïa kiba bun ki bynta jong ki jingdon jingem jong ka India ban ïahap bad kiba bha tam ha ka pyrthei.
Ka jingmut ba shisha jong u mawmer ba kongsan jong u Myntri Rangbah duh kam shong ha ka jingbun ki sngi ba la shakri, hynrei ha ka jingheh jong ka jingkylla ba la pynpoi. Ka jinglong nongïalam jong u ka la buh ïa ka bha ka miat jong ki ba duk bad ki nongrep, ïa ki jingangnud jong ki briew kiba pdeng ka ïoh ka kot, bad ki jingangnud jong ka ri India kaba dang kiew ha ka bynta pdeng jong ka jingsynshar.
Katba ka ri ka nang ïaid shakhmat, kane ka jingïaid lynti jong ka jingkylla ka dang ïai bteng da ka jingkut jingmut kaba thymmai ban tei ïa ka Viksit Bharat shuwa u snem 2047.