Lada phi lap ba bamsap ujor da ka FIR wat ju thad ha ki banner bad Poster ïa u Symbud Myntri Rangbah bad SP: Dhar

Shillong, Risaw 3: U Symbud Myntri Rangbah ka jylla u ma Sniawbhalang Dhar u la ong ba ka long kaei kaei kaba sngewsih ban thoh da ki kyntien khlem akor ha ki Poster bad Banner ban wah ha kylleng ki jaka jongka nongbah Shillong pyrshah ïa u Symbud Myntri Rangbah bah Prestone Tynsong bad u SP ka East Khasi Hills u bah Vivek Syiem hadien ka jingkhynra ïa ka jaka lum pisa beaiñ ki pulit ha Mawkhanu bad Thangshalai.
ïa kine ki poster la tah bad wah ha ki jaka kum ha Mawlai, Mawkhar, Motphran bad kiwei kiwei ki jaka naduh ka Sngi Thohdieng ha kaba la kynnoh ba u bah Prestone bad u bah Vivek ki pyndonkam ïa ki trok kum ki ATM. Kane ka la mih hadien shi sngi ba ka KSU ka la pyllait paidbah ïa ki video ba ka la ïoh ring ïa ka jinglum pisa beaiñ ki pulit hapdeng 200-500 tyngka na kawei kawei ka trok ha Mawkhanu bad Thangshalai.
Haba kylli halor kane, u ma Sniawbhalang u la ong “U SP u la dep kren shai bad kam bha ban thoh da ki kyntien khlem akor ha ki poster bad banner pyrshah ïa ki riew sorkar khlem kino kino ki jingpynshisha.
U la kyntu ïa ki seng bhalang ne ki riew paidbah ban ïaid da ka lynti jong ka aiñ lada ki lap ïa kano kano kaba leh bakla.
” Barobor ngi ju kyrpad ïa kino kino ba lada don kano kano ka jingleh bakla hangno re hangno ki lah ban leit da ka lynti jongka aiñ ban ujor da ka FIR namar kane ka dei ka lynti kaba dei eh” ong u ma Sniawbha.
” Ka long kaei kaei kaba sngewsih ban ïohi ia kiba kum kine ki jingkynnoh khlem da pat dep ka jingtohkit.Ngi dei ban ïa burom mar kylliang kum ki para briew” ong u ma Sniawbha.
Na ka liang u SP ka East Khasi Hills u la dep thung da ka jingtohkit halor kine ki jingkynnoh bad u la dep rai ruh ban weng kam shwa shipor ïa kito ki pulit kiba donkti ha katei ka kam lum pisa beain.