Donkam ban pynshisha la ka projek ropeway kan pynjot shisha ïa ki tyllong um kumba kam ka JAC: Bah Sanbor

Shillong, Naiwieng 12 : Ka South Shillong Advisory Committee hapoh ka jingïalam jong u MLA ka thain bad Myntri Sorkar ka Jylla, Bah Sanbor Shullai hynne ka sngi Palei ki la leit ban ai da ka jingthoh ha ophis treikam jong u Myntri Rangbah ka Jylla Conrad K Sangma ban dawa thaw noh da ka Expert Committee kabantohkit bniah la ka dei neem ba katei ka projek ropeway kan pynduh lut ïa ki tyllong um kumba la kam da ka Joint Action Committee kaba ieng pyrshah ïa katei ka projek ropeway.
Haba kren bad ki lad pathai khubor hadien ba la dep ban wan aiti ïa ka jingthoh ryngkat ka jingsynran lang ki nongïalam shnong, ki seng longkmie bad ki riewrangbah ka thain, u Bah Sanbor u la ong ba ka Committee ka la leh ïa kane ka kam katkum ka jingai jingmut bad ka jingsyllok lang jong baroh ha ka sngi Balang ha State Convention Centre ba donkam ban don da ka kynhun ki riewshemphang kiban tohkit bniah halor kine baroh.
“Hynin ka sngi ngi la wanrah ïa kane ka mat hakhmat baroh ki Dorbar Shnong, ki nongïadon bynta bad ruh ha khmat ka JAC, hynrei ha ka jaka ban ïakren halor kane ka jingtyrwa, ki la hylla pynban ha ka jingïalang,” u la ong.
Shuh shuh u la ïathuh ba namarba u Myntri Rangbah ka Jylla u don mynta shabar kumta un sa ïakynduh ïa ka committee ha ka taïew ban wan ban ïakren halor kane ka jingtyrwa.
“Ngin sa ïakren bad u Myntri Rangbah ka Jylla namar ka jingtyrwa jong ngi ka long ban thaw ïa ka kynhun wad bniah kaba laitluid,” la ong u Bah Sanbor.
U Myntri u la kyntait ïa ka jingkynnoh jong ka JAC ba ka jingïalang ka la kut kynsan, da kaba ong ba kane ka dei tang ka jingthaw khana.
“Kine baroh ki long ki jingkynnoh kiba lamler bad khlem nongrim. Baroh ki jingkynnoh kiba ki la pynmih pyrshah ïa baroh kiba la wan sha katei ka jingïalang ki long kiba lamler bad khlem nongrim,” u la ong.
Haba kylli halor ka jingïaid paidbah jong ka JAC, u Bah Sanbor u la kyntait ban kren ei ei hynrei u ong ba ha kane ka jingwan ai jingthoh sha ophis u Myntri Rangbah kiba wan ki dei tang ki nongshong shnong jong ka Laban bad ka 19th South Shillong.
Katkum ka jingthoh ba ki aiti, la tyrwa ban thaw ïa ka kynhun wad bniah kaba kynthup ïa ki riewshemphang na ki jaka pule ba pawnam ha ka rib a kynthup naduh ka IIT bad NIT, khnang ba ka jingwadbniah kan long kaba laitluid bad kaba shisha kaban sei lut ïa ki jingshisha baroh.
La kdew ruh ba lada shu rai pynduh noh ïa ka projek khlem ki sakhi sabut kiba khlaiñ katkum ka saïan bad pyrshah ïa ka jingsngew jong kiba bun ki nongïadon bynta kata kan long kum ka jingpynduh noh ïa ka roi ka par ha ka 19-South Shillong.