Ngim kren ïa ka jinglong trai ka jaka hynrei ka kompani bymdei riewlum ka la treikam khlem laisen: EM Elaka
Dang bishar ka Council shwa ban leit Ïingkashari'
Shillong, Naiwieng 12: Ka Khasi Hills Autonomous District Council (KHADC) ka la ong ba ka jingleh jong ka halor ka projek Shillong Peak Ropeway kam dei satia ban dawa ïa katei ka jaka, hynrei ka dei halor ka kompeni shimet kaba leh ïa ka kam khaïi khlem da ïoh ïa ka trading license.
U Executive Member in-charge ka Elaka Affairs, u Denzil Chen u la ong ba ka kompeni kaba pyntrei ïa ka Shillong Ropeway ka dei ka kompeni shimet.
“Wat lada kata ka dei ka jaka sorkar, ngi don ka bor halor jong ka. Ngim kren ïa ka jinglong trai, ngi ong ba kane ka dei ka kompeni shimet bad ka Company bym dei riewlum ne trai ri trai muluk bad lada ka leh ïa ka kam ha ka jaka sorkar, ngi don ka bor, ka bor bad ka bor ban peit ba ki ïoh ïa ka laisen khaïi,” la ong u Chen.
Ka KHADC ka la khang khyrdep ïa kane ka jaka treikam ha ka 27 tarik u Risaw halor ka nongrim ba ka kompeni, KEC-TCL (JV) kaba pyntreikam ïa kane ka projek kam shym la ïoh trading license na ka Council.
Katkum ka jingong jong ka KHADC, la pynpoi ar tylli ki show-cause notice ne ka jingpan jingpynshai sha katei ka kompeni, kaba nyngkong ha u bnai Jymmang bad kaba ar pat ha u bnai Nailur mynta u snem, namar ba ka la pyntreikam khlem ka trading license. Hynrei kane ka kompeni kam shym la ïoh ïa ka NoC na ki bor ba dei bad kiba halor ban pan ïa ka trading licence.
Kane ka jingkhang khyrdep ïa kane ka jaka treikam la shim katkum ka Section 7A jong ka United Khasi-Jaiñtia Hills District Trading by Non-Tribal Regulation, 1954 namar ka jingkynnoh ba la pynkheiñ ïa ka Section 3 – ka kam khaïi pateng khlem laisen.
Ka sorkar ka la kyntait ïa katei ka jingshah kynnoh. Ka tnad jngohkai pyrthei, kaba la ong ba ka jingleh jong ka Council kam long kaba dei, bad kham hadien ka la phah ïa ki bor distrik ban leit pynpait noh ïa ki tala jingkhang ha ka ophis jong ka jaka ba pyntrei ïa katei ka projek.
Na ka liang u Bah Chen u la ong ba ka KHADC ka dang bishar bad khmih bniah (Examine) ha ka liang jong ka aiñ ha shwa ban rah ïa kane ka kam sha ka Ïingbishar.