Pynthikna ba ka eksam NEET kan dei ban long kaba ïaid beit ïaid ryntih

New Delhi, Jylliew 13: U Cabinet Secretary Dr. T. V. Somanathan mynta ka sngi u la peit bniah ïa ka jingpynkhreh ïa ka jingpynlong biang ïa ka eksamin NEET ha ka jingïalang bad u Director General ka National Testing Agency (NTA).
Ha ka jingïalang peit bniah, u Cabinet Secretary u la ban jur ïa ka jingdonkam ban pynthikna ïa ka jingpynlong biang ïa ka eksamin kaba ïaid beit ïaid ryntih, kaba shai bad kaba shngaiñ lyngba ka jingïatreilang kaba jan hapdeng baroh kiba don bynta ha kane ka kam. Ïa eksamin NEET la pynkhreh ban pynlong biang ha ka 21 tarik u Jylliew 2026.
U Cabinet Secretary u la ong, “Ka Sorkar Pdeng, ki Sorkar Jylla bad ki bor pynïaid District ki ïatreilang ha ka jingïatreilang kaba jan, ban pynthikna ïa ka jingïaid beit ïaid ryntih ka jingpynlong biang ïa ka eksamin NEET. Kino kino ki briew kiba pyrshang ha kano kano ka rukom ban pynthut ïa ka eksamin kin shah pynshitom katkum ka aiñ.”
U Somanathan u la peit bniah ïa ki jingpynkhreh bad ki Secretary jong ka Sorkar Pdeng bad ki tnad ba dei peit ha ka 1 tarik u Jylliew 2026.
Hadien kata, ha ka 4 tarik u Jylliew 2026, u la pynlong ruh ïa ka jingïalang peit bniah bad ki Chief Secretary jong ki Sorkar Jylla ban bishar bniah ïa ka jingïaid shaphrang jong ki jingpynkhreh.
Kine ki jingïalang ki long ban pynthikna ïa ka jingïatreilang kaba bha, ban pynkhlaiñ ïa ka jingpynkhreh bad ban pynneh ïa ka burom bad jingshaniah jong ka rukom pynlong biang ïa ka eksamin NEET.