Watla ym don shuh jingïakynad ha Block 1 kam mut ba la don ka suk ka saiñ : HBDRF
'Da ka 'Entry Tax Gate' buh ki briew Assam ha Khanduli'
Shillong, Naiwieng 15: U Chairman ka Hynñiewtrep Border Development and Research Forum (HBDRF) u Chandame Sungoh u la ong ba ka jingbym don ki jingïakynad ha Block I kam mut ba ka jingsuk ka la wanphai biang ha ki shnong khappud bad ka Assam.
“Ki jingïakynad ki la jah noh namar ba ngi la long kiba jemnud palat bad ngi la duh jingkyrmen ia la ka bok ka nusip bad la ka jong ka jinglong,” ong u Sungoh ha ki nongthoh khubor.
U la kynnoh ba ha Khanduli, ki briew na Assam ki la buh da ka “Entry Tax Gate”. U la ong ba haba u la leit jngoh ïa katei ka jaka ha ka 18 tarik u Risaw, ka jingtei ka dang ïaid shakhmat. U la ong ba ka Meghalaya kham mynshwa ka la black-top ne siang rong ïa kawei ka surok shaduh Umsara kaba jngai 12 km na Khanduli, hynrei mynta katei ka surok ka kut ha ka jaka ba ka khyrdop ka wan shaneng.
Ha Lapangap, u la kynnoh ba hadien ka jingwan jngoh jong u Deputy Chief Minister u Bah Sniawbhalang Dhar ha ka 2 tarik u Jylliew, 2026, la shah ïa ki briew na Assam ban rep ha ki jaka jong ka Meghalaya lyngba ki skhim sorkar Assam.
Ha Mukroh, u la ong ba ki nongshong shnong jong ka Assam ki la pom ïa ki dieng kiba la rim da ki spah snem kiba la pynneh pynsah da ki nongshong shnong hapoh u pud u sam jong ka Meghalaya, ki la thung ïa la ki jong ki jait dieng, bad ki dang pynkhreh ban shong ban sah hangtei.
“Kaei kaba ka sorkar jong ngi ka leh”, u la kylli.
U bah Sungoh u la ong ba ka Block I bad II ka dei shaphang ka jingpynkylla biang ïa ki jaka na Assam sha Meghalaya, bad ba kine ki dei ki jaka ba don jingïakajia. U la ong ba ki jaka ba u la jer kyrteng ki dei hapoh ka jylla Meghalaya.
Shuh shuh u la kam ba ki jaidbynriew Karbi kiba sah ha ka liang ka Meghalaya ki la pynrung kyrteng ban thep vote ha Assam ha ka Special Intensive Revision (SIR) kaba dangshen.
U la ong ba ka forum kan thoh sha ki 36 ngut ki MLA na ki konstitwensi Khasi-Jaiñtia bad kan pynlong ïa ka jingïakhih ha Shillong ban pynbor ïa ka sorkar ban pynbeit ïa ki kam khappud.