Sha ka Guinness World Record rung ka jingtem ksing ba 1000 tylli ha rilum Garo
Ha ka jingrakhe dap 50 snem ka Wangala Festival
Tura, Naiwieng 15: Kaei kaba la sdang tang da ki 10 tylli ki Ksing ha u snem 1976 ka la nangroi katba nang mih ki snem sha ka jingrakhe kaba shongkun bha kaba la ïashim bynta palat 1000 ngut ki nongtem ksing, namar ka jingdap 50 snem ka Hundred Drums Wangala Festival kala ioh rung ha Guinness World Records ha ka sngi Saitjain ha ka Shad Wangala kaba heh tam.
Ïa kane ka record la ioh pdiang ha Garo Heritage Village, Wangala A·dam, Chibragre, kaba hap hapoh West Garo Hills, ha kaba ki shi hajar tylli ki Ksing la tem lang ha ryngkat bad ki kynthei kiba shad lem bad ki rang ha ka jingpyni kyrpang na ka bynta ka jingpyrshang ban ioh ïa ka recoed.
U nongbishar jong ka Guinness World Records u Richard Williams Stenning na United Kingdom u la pynbna ïa kane ka jingjop ha ka por 3.50 baje janmiet, kaba la sdang ïa ka jingrakhe hapdeng ki hajar ngut ki paidbah kiba la ïalum lang ha katei ka jaka.Ka kynhun kaba 12 ngut na Garo Hills ka la ïashim bynta ruh ban bishar ïa kane.
Kane ka jingshad kaba la pynioh ïa ka rekod ka la long hapdeng jong ka jingpynbna ïa ka Jubili Ksiar jong kane ka tamasa, kaba la nang kiew stet ha kine ki sanphew snem.Na ka jingsdang kaba rit jong ka da ki 10 tylli ki ksing, kane ka tamasa ka la nang kiew sha ka 100 tylli ki ksing shwa ban poi sha ka thong kaba 1,000 tylli ha ka jingdap 50 snem jong ka, kaba pynurlong ïa ka jingthmu jong u (L) P. A. Sangma.
Ha kane ka sngi pynkut la don lang u Union Minister ba peit ïa ka tnad Arts and Culture bad Tourism jong ka ri India u Gagendra Singh Shekhawat, ha ryngkat u myntri rangbah ka jylla Meghalaya u Conrad K. Sangma, Deputy Chief Minister Bah Sniawbhalang Dhar, Power Minister T. D. Shira bad u Leader of Opposition U Dr Mukul M. Sangma bad kiwei kiwei de.
Haba ai khublei ïa ki paidbah ka Garo Hills halor kane ka jingjop, u Shekhawat u la ïa ka jingkhublei na ka kyrteng jong u Myntri Rangbahduh bad ki paidbah ka ri India.U la batai ïa ka Wangala kum ka jingpynpaw ïa ka jingsngewnguh ïa ka mariang na ka bynta ka jingot ïa ki jingthung bad u la ong ba kane ka tamasa kan kyntiew ïa ka kam jngohkai pyrthei bad ban thaw ïa ki lad kamai jakpoh na ka bynta ki samla trai ri.
U la pynpaw ruh ïa ka jingkloi jong ka sorkar kmie ban kyrshan ïa ka Meghalaya ban kyntiew ïa ka Garo Hill kum ka jaka jngohkai pyrthei ïa ka kolshor. U myntri rangbah ka jylla u Conrad K. Sangma u la ai khublei ïa ki nongpyniaid, ki nongshad bad ki paidbah kiba la lah ban rah ïa kane ka tamasa sha ka rynsan jong ka pyrthei.U la pynkynmaw ïa ka jingkylla jong ka ha kine ki 50 snem ba la leit noh bad u la ong ba ka jingjop ka pyni ïa ka jingtreilang jong ki paidbah ha kaba pynneh pynsah bad kyntiew ïa ki riti dustur jong ki Garo.
U Symbud Myntri Rangbah ka Jylla bad u Nongïalam ka Liang Pyrshah ki la ai khublei ruh ïa ka imlang sahlang, da kaba kam ïa ka bynta jong ka ban pynim ïa ka tamasa ha ki pateng la pateng.