Haduh 6 tylli ki projek National Highway ba kot 3,214 klur wan buh mawnongrim u Nitin Gadkari ha Shillong

SHILLONG, Jylliew 15: U Myntri ka Sorkar Pdeng uba khmih ïa ka tnad Road Transport bad Highways, u Nitin Gadkari, ha ka sngi Nyngkong u la buh mawnongrim na ka bynta ki hynriew tylli ki projek National Highway ha Meghalaya kiba shongdor haduh 3,214 klur, ha ka jingïalang kaba la long ha Polo Ground, Shillong.
Ha kane ka prokram la donlang naduh u Myntri Rangbah ka Jylla Conrad K Sangma, u Lamphang ka Iing Dorbar Thawain ka Jylla u Thomas A. Sangma, ki Symbud Myntri Rangbah u Bah Prestone Tynsong bad u Bah Sniawbhalang Dhar, u MP ka Tura Lok Sabha Constituency, u Saleng A. Sangma, ki Myntri Sorkar, ki MLA bad ki heh sorkar.
U Myntri haba kren ha ka jingïalang u la ong ba ka Meghalaya kadei ka jylla kaba riewspah ha ka jingitynnad mariang, ka kolshor bapher bapher bad ka bor ban kyntiew ha ka ïoh ka kot, ka donkam ïa ka jingdon ki surok kiba paka ban plie lad ïa ki kabu thymmai ha ka roi ka par, ka kam jngohkai pyrthei, ka khaïi pateng bad ka lad ïohkam ïohjam.
Shuh shuh u ong ba hapoh ka jingïalam jong u Myntri Rangbahduh ka ri, u Narendra Modi, ka Meghalaya mynta ka sakhi ïa ka jingkylla kaba khraw ha ka liang ka jingïadei surok.
“Ki projek National Highway kiba shongdor kumba 52,400 klur ki dang ïaid mynta ha ka jylla. Ki projek kiba kynthup kumba 820 kilomitar la dep pyndep, katba ka jingtei ka dang ïaid ha kumba 310 kilomitar, bad ki projek kiba kynthup kumba 450 kilomitar ki dang don ha ki kyrdan bapher bapher jong ka jingthmu bad ka jingpyntrei,” la ong u Gadkari.
U la ong ruh ba bun ki projek kiba kongsan ba la pyndep ha kine ki snem ba la dep ki la pynbha shibun ïa ka jingïadei surok ha ka jylla. Ka Shillong–Nongstoin–Tura Trans Meghalaya Highway ka la pynduna ïa ka por ban ïaid na Shillong sha Tura na kumba 12 kynta sha tang kumba 6 kynta. Kumjuh ruh ka Jorabat–Umiam Four-Lane Road, Tura–Dalu Road, Jowai–Malidor Road bad Ranikor–Baghmara Road ki la pynkhlaiñ ïa ka leit jingleit lyngba ka surok bad ki bynta khappud jong ka jylla.
Kum shi bynta jong ki jingpyrshang ban nang pynbha ïa ka jingïadei surok, hynriew tylli ki projek National Highway kiba jrong palat 117 kilomitar bad kiba shongdor kumba 3,214 klur la plie paidbah bad buh mawnongrim ha kane ka sngi.
Napdeng ki projek ba la plie paidbah, ka Package-I jong ka Shillong–Dawki Road Project kaba jrong kumba 11 kilomitar la pyndep ha ka jinglut 351 klur. Kane ka projek kan kyntiew shuh shuh ïa ka leit ka wan hapdeng ka Shillong bad Dawki bad ka khappud India–Bangladesh bad kan kyntiew ïa ka kam jngohkai pyrthei, ka khaïi pateng bad ka roi ka par ha ka thaiñ.
Ka Jowai Bypass Project, kaba la pyndep ha ka jinglut kaba106 klur bad kaba jrong kumba 5 kilomitar, ka la pynduna ïa ka jingdheng kali ha sor Jowai bad ka la wanrah ïa ka jingshngaiñ ha ka surok bad ka leit ka wan kaba kham sted.
La buh ruh ïa u mawnongrim na ka bynta saw tylli ki projek National Highway kiba heh. Kine ki kynthup ïa ka Tura Bypass Project ha NH-127B bad NH-217 kaba jrong kumba 29 kilomitar ha ka jinglut kaba 952 klur. Kane ka projek kan weng ïa ka dheng kali na kito ki jaka ba jur bha ka dheng kali bad kan pynduna ïa ka dheng kali bad kan pynsuk ïa ka jingïaid sha ka khappud hajan Dalu.
Ka bynta jong ka Durgiri–Phulbari Bridge sha Selsella–Simbukolgre (Package-I) ha NH-127B yn sa shna ha ka jingjrong kumba 32 kilomitar ha ka jinglut 737 klur. Da kaba ïasoh bad ka jingkieng Dhubri–Phulbari kaba dang sa tei halor ka wah Brahmaputra, kane ka projek kan pynkhlaiñ shibun ïa ka leit ka wan ha West Garo Hills bad kan pynsuk ïa ka jingïoh rung sha ki jylla ba marjan.
Ka Pynursla Bypass Project ha NH-206 ban sa shna ha ka jingjrong kumba 8 kilomitar ha ka jinglut kaba 564 klur. Kane ka bypass kan pynduna ïa ka jingdheng kali ha sor Pynursla, kan pynsted ïa ka jingïaid kali bad kan pynkhlaiñ ïa ka leit ka wan sha Dawki, sha ka wah Umngot bad kumjuh sha ka khappud nalor ba kan ïarap ïa ka kam jngohkai pyrthei bad ka khaii pateng lyngba ka khappud.
Kumjuh ruh, ka Package-II na Selsella–Simbukolgre sha Koiragre yn sa shna ha ka jingjrong kumba 32 kilomitar ha ka jinglut kaba 504 klur. Kane ka projek kan nang pynbha ïa ka leit ka wan ha West Garo Hills bad kan pynsuk ïa ka jingïaid ki mar bad kan kyntiew ïa ka roi ka par ha ka thaiñ.
U Gadkari u la ong ba ka Shillong–Dawki Corridor, kaba dang ïaid ka jingtei mynta, kan pynbha shibun ïa ka jingïadei bad Bangladesh lyngba ka khappud Tamabil, kan pynduna ïa ka jingdheng kali ha Upper Shillong bad kan pynduna ïa ka por ïaid lynti.
U la ong ruh ba kine ki projek kin kyntiew shibun ïa ka khaïi pateng bad ka kam jngohkai pyrthei ha Dawki, Dalu bad Sohra, katba kin pynmih ruh bun ki lad jingïohkam bad ki lad kam lajong.
Shuh shuh, u la ong ba ka jingïadei kaba kham bha kan pynsuk ïa ka jingpoi biang por sha ki jaka sumar bad ki jingdonkamkyrkieh ha ki thaiñ kiba jngai lyngba ka jingïasoh kaba kham bha bad Shillong bad Guwahati.
La khmih lynti ruh ba kine ki projek kin pynkhlaiñ ïa ka jingïaid lynti jong ki mar rep bad kin kyntiew ïa ki kam trei tynrai kum ka kam shna tiar siej, ka jingthain Ryndia (Eri Silk) bad ka kam shna khiew khyndew.
U Gadkari u la pynskhem biang ïa ka jingangnud jong ka Sorkar Pdeng ban ai ïa ki surok National Highway kiba paka bad kiba don ha ka kyrdan ba hakhlieh tam ha Meghalaya bad ha ka thaiñ Shatei Lam Mihngi baroh kawei, khnang ban pynthikna ïa ka jingïaid kali kaba sted, kaba suk bad kaba shngaiñ.