Ther ka NPP ïa ka VPP ba kheiñ dewthala ïa ka bor ka iktiar ki Rangbah Shnong

Shillong, Nailur 30: Ka National People Party (NPP) kala ther tyngeh ïa u Bah Ardent Miller Basaiawmoit bad kumjuh ruh ïa ka party jong ka Voice of the People Party (VPP) halor ka jingweng noh jong ki ïa kawei na ki section jong ka Land Act 2021, kaba dei ka bynta ba kongsan eh katkum ka riti dustur bat khyndew bat shyiap bad ka synshar khaddar ha ka jaitbynriew ka jong ngi.
Haba pynshai halor ka jingkren jong u Bah Ardent MillerBasaiawmoit, u General Secretary jong ka National People Party Farmers Front u Bah Egentstar Kurkalang u la ong, Ki Dorbar Shnong ki Dorbar Raid ki Dorbar Hima kidei kiba ha khlieh duh ban peit ïa ki kam jaka puta naduh ban ai dulir bad sam bynta bad ha kiwei kiwei de ki bynta lada don kiba donkam ban pyniaid ïa ki khyndew ki shyiap katkum ka riti dustur
“Kaba lyngngoh ka long ba ïa kane ka jingpyndam (delete) ne weng jong ka KHADC ïa ka kyntien ban da don shwa ka jingïaphylliew jingmut bad ki Dorbar Shnong ki Dorbar Raid bad ki Dorbar Hima halor ki khyndew Raid ha shwa ban ai bynta lane lada don ka jingïadie ïa thied da kaba ki shim ha lade hi ha ka bor jong ka Executive Committee lyngba ka KHADC ban leh ïa kata da kaba ki pynduh noh ïa ka lad bad ïa ka bor jong ki Dorbar Shnong ba ki kynnoh kylla pynban sha ki Dorbar Shnong katkum ka jingkren u Bah Ardent” ong u Bah Kurkalang.
Shuh shuh u la ong, “Haba ngi peit bad wad ngim iohi bad ngim tip ba ka don kata ka jingkhot jong ka Executive Committee jong ka KHADC kaba la synshar da ka party Prah ïa ki Rangbah Shnong ïa ki Syiem Raid ki Lyngdoh Raid bad ïa ki Syiem jong ki Hima bapher bapher ha shwa ba kin pynkhreh ïa kane ka land bill ka jong ki”.
U Bah Kurkalang u la ong, Ynda kila sngewthuh ba ka mih ka jingpyrshah kaba jur na ka liang jong ki khun Khasi Khara na man la ki shong bad na man la ki raid ba ki pyrshah ïa kane jingleh jong ka Executive jong ka District Council kaba la ïalam da ka VPP kaba im im peit peit kila knieh noh ha kti jong ki ïa ka bor ka iktiar jongka Dorbar Shnong ki Dorbar Raid bad ki Dorbar Hima, katkum ka Land Act 2021 kala kren shai ha ka section 16 (The Executive Committee after prior consultation with the respective Dorbar Shnong, Dorbar Raid and Dorbar Hima may by notification fixed the ceiling over the settlement allotment or setting apart of the Raid Land made by it or under its sanctionunder the provision of this Act).
“Kaba lyngngoh ka long ba na ka liang jong ka Executive Committee jong ka party VPP ki khein dewthala ïa ka bor ka iktiar jong ki Rangbah Shnong, ki khein dewthala ïaa ki bor jong ki Dorbar Raid bad ki Dorbar Hima kaba la ju don naduh kulong kumah ha ka jaitbynriew Khasi ka jong ngi ba ym don da kiwei pat ki bor kiba kham halor bad kiba lah ban tuklar ha kaba ïadei bad ka kam khyndew kam shyiap khamtam ha kaba ïadei bad ka khyndew raid kadei beit ka rai bad ka bor jong ki nongsynshar bad ka dorbar hi baroh kawei lada kadei ka Dorbar Shnong, Dorbar Raid ne Dorbar Hima” ong u Bah Kurkalang.
Hynrei kumba ka long mynta, Ngi sngewthamula ba kam pat don kano kano jingïaphylliew jingmut bad ki khlem khot sha ka jingïakren ki khlem khot ha ki jingïalang lane ka jingpan jingmut na ki Rangbah Shnong, na ki Dorbar Shnong na ki Dorbar Raid na ki Syiem Raid ki Lyngdoh Raid lane ki Sirdar bad na ki Syiem jong ki Hima kiba pher bapher hynrei kila shu leh donbor hi tang ma ki, u la ong.
“Kane kadei kaba ngim lah ban pdiang da lei ruh kaba hangne ngi sngewthuh shai kadei hi ka jingmlien bad ka jinghikai ka jong ki bad lada don kano kano ka jingbakla ki kloi ban kdew kti ïa kiwei pat ïa kaba kim leh kiba pli hynrei ki pynkit pap ïa kiwei katba ïa ka kam leh ma ki bad kane ka kdew shai ba na ka liang jong u Bah Ardent bad na ka liang jong ka party VPP kaba synshar ha KHADC kila leh ïa kane ka kam kaba ktah shisha ïa ka ïap ka im bad ïa ka hok riti dustur kaba kyrpang tam jong ka jaitbynriew ban pynduh bor noh ïa ka Dorbar Shnong, Dorbar Raid ne Dorbar Hima da kaba ki tei pop sha ki Rangbah Shnong kiba pli kiba ym tip eiei ruh em halor kane ka kam leh thombor jong ka party VPP bad kane kadei kaba ngim lah ban pdiang da lei lei ruh em bad hangne u paidbah un shim ka jingbishar kaei kaba dei ban leh ïa kum kine ki jingleh donbor jong ka party jong ki” u la ong.