Da ka projek surok Highway ba 39,800 klur ban pynkylla dur ïa ka Meghalaya kum ka khyrdop sha kiwei ki jylla

Shillong, Jylliew 15 : U Myntri ka Sorkar Pdeng ba peit ïa ka tnad Road Transport and Highways, u Nitin Gadkari ha ka jingïalang kaba long ha Shillong ha kane ka sngi Nyngkong u la ïathuh ba ka Meghalaya ka la ïoh bun tylli bha ki projek surokbah ne ki National Highway kiba kot sha ka 39,800 klur tyngka na ka bynta ban shna kumba 450 kilometer ka surokbah ba thymmai ha kylleng ki bynta jong ka jylla.
Ïa kane u Myntri ka Sorkar Pdeng u la pynbna haka jingïalang plie ïa ka North East India Infrastructure Summit and Exhibition (NEIINFRA 2026) kaba long ha Lariti Performing Arts Centre, Shillong.
Kine ki projek ki kynthup ïa ka projek Greenfield Shillong – Silchar Corridor kaba la mang ha ka jinglut kaba 23,000 klur tyngka na ka bynta ban shna ïa ka surokbah kaba don kumba 165 kilometer. U Myntri ula ong ba kane ka surokbah kan long kawei na ki surok kiba kongsna bha na ka bynta ka leit ka wan ha ka thain shatei lam-mihngi jong ka Ri.
“Kane ka corridor kan pynduna ïa ka jingjngai ha ka leit ka wan haduh mar shiteng bad kan pynkloi ïa ka leit ka wan bad ka Tripura Mizoram bad Manipur lyngba ka Silchar,” u la ong.
Shuh shuh u ong ba kane ka projek kan kyntiew lut ym tang ïa ka lad kamai kajih hynrei wat ïa ki kam jngohkai pyrthei bad ki jaka teikam bapher bapher. U ong ba kane kan ïarap ruh ban kyntiew ïa ka jingroi ki karkhana bad kiwei kiwei ki nongwan bei tyngka ha ka thain.
Kawei pat ka projek kaba u pynbna ka dei ka surokbah 4-Lane Greenfield Jorabat–Barapani Corridor kaba don kumba 66 kilometer bad shongdor kumba 8,500 klur tyngka kan kylla long kawei pat ka surok bah kaban pynstet ïa ka leit ka wan hapdeng ka Guwahati bad Shillong.
“Kane ka projek kan pynduna ïa ka por ban leit ban wan kan hiar na ka 2.5 kynta sha ka 1 kynta ei ei bad kan kylla long ruh shi bynta jong ka surok ban sa wan hadien ba tip kum ka high speed Siliguri–Guwahati–Shillong–Silchar economic corridor,” u la ong bad bynrap bad kane kan pynkhlain shuh shuh ïa ka jingïatylli jong ka thaiñ shatei lam-mihngi jong ka Ri bad kiwei pat ki bynta jong ka Ri.
U Gadkari u la kdew ruh ïa ka jingdonkam jong ka surokbah Darugiri–Baghmara–Dalu jong ka NH-217, kaba la mang kumba 4,000 klur tyngka na ka bynta ka surok kaban jrong kumba 136 kilometre. U la ong ba kane ka projek kan kyntiew stet bha ïa ka leit ka wan ha rilum Garo bad khamtam ha ki bynta khappud jong ka India bad Bangladesh ha kane ka jylla, ban pynsuk ïa ka ka wan sha ki ïew ki hat, ki jaka sumar, sha ki jaka pule bad khamtam eh na ka bynta ka lad kamai kajih na bynta ki nongshong shnong ha kito ki thain.
Nalorkata, u Myntri u la pynbna ruh ba kiwei ki projek kum ka surokbah Pomlum–Umtyngar ka bynta jong ka Shillong–Dawki Corridor, nangta ka jingpynbha ïa ka surok Tura–Dalu Route, nangta ka Tura Bypass Project, ka Pynursla Bypass Project bad ka NH-127B Connectivity Projects kaban pynïasoh bad ka jingkieng Dhubri–Phulbari, kan nang pynkhlain shuh shuh ïa ka leit ka wan ha ka jylla.
Ha kane ka jingïalang kaba arsngi, la poi lut naduhki nongthawain, ki nongpynïaid karkhana, ki nongbei tyngka nalor ki heh sorkar bad kiwei kiwei ban ïatai halor kiba bun ki phang kiba dei na ka bynta ka roi ka pa jong ka thain.
Ha ka jingïalang plie jong ka NEIINFRA 2026 la donlang ruh naduh u Myntri Rangbah ka Jylla u Conrad K. Sangma, Myntri Rangbah ka Nagaland u Dr. Neiphiu Rio, Symbud Myntri Rangbah ka Nagaland u TR Zeliang, Symbud Myntri Rangbah ka Meghalaya Bah Prestone Tynsong bad Bah Sniawbhalang Dhar, ki heh sorkar jong ka sorkar pdeng bad sorkar jylla bad kiwei kiwei.