Hiar khynra ka KSU ïa ki jaka lum pisa ki pulit ha Mawkhanu bad Thangshalai

Shillong, Nailur 30 : Ka Khasi Students’ Union (KSU), ka la hiar khynra bad sei madan ïa ki kam dawa pisa be-aiñ ba la kynnoh donkti da ki Pulit ka Jylla ha ka surok National Highway ha Mawkhanu bad Thangshalai kaba hap hapoh ka Mawryngkneng Police Station.
ïa kane ka jingkyndang kam beaiñ ki pulit la ïalam da u Education Secretary ka KSU-CEC samla Alerick Kharjana, kaba la leit jurip ban ïoh kem ïa kane ka kam be-aiñ hadien ka jingïoh pdiang ïa ki jingujor na kiba bun ki briew.
Ki dkhot ka KSU kila ring video ban pynshisha ïa kane ka kam beaiñ jong ki Pulit-kiba pyni ruh ïa ki pulit katba ki dang shim pisa na ki trok kiba kit tiar, kit marpoh khyndew, kit marbam. La kynnoh ba ki Pulit kila khrong hapdeng 200 haduh 500 tyngka na kawei kawei ka trok.
Ka KSU ka suba jur ba ka jingnud ki Pulit ban leh ïa kane ka kam beaiñ lehse ka lah ban don ka jingïapynbeit da ki Heh Pulit. “Kumno kine ki Pulit barit baria kin nud ban lum pisa bad miet bad sngi na ki nongniah trok khlem da don ka jingïapynbeit bad donkti ki heh Pulit” kala buh jingkylli.
Ka KSU ka buh jingkylli ïa ki bor pynïaid district ka East Khasi Hills ba mano ba aibor ïa kine ki Pulit ba kin lum pisa na ki trok. “Hato dei u SP Bah Vivek Syiem lane u DC Abhilash Baranwal, IAS lane baroh arngut bad lehse ki Myntri Sorkar ruh ki don bynta lang halor kane ka kam?” kala kynnoh.
Haba dawa ïa ka Sorkar ban pynlong ïa ka jingtohkit ba laitluid halor kane ka kam khnang ban rat dyngkhong ïa kine ki kam beaiñ da ki riew bat aiñ, ka KSU ka la ong “Ka Seng kan sa leit buh ïa ka jingujor hakhmat ki bor pynïaid ha kine ki khyndiat sngi ban wan”.
“Kum kine ki jingjia ka pyni ïa ka jingbamsap kaba jur hapoh ka tnad pulit bad ka KSU kan rat dynkhong ïa kum kine ki kam bamsap kiba pyntroiñ ïa ka jylla ha ka roi ka par ha kaba ki mar bam mar dih ki kiew dor man la ka por” kala ong.
Ka Seng ka dawa ba dei ban weng mardor ïa u SP ka East Khasi Hills District u bah Vivek Syiem uba la ailad ïa kum kane ka kam ban jia hapoh ka jingpeit ka jong u bad kumjuh ruh ïa u DC. Dei ban don ka jingtohkit kaba bniah halor kane ka kam.
Ka Seng kan dang ïai pynjur ban pynlong ïa kum kine ki talasi wat lada dei ki pulit ne ki briew jong ka aiñ kiba leh donbor.