Maham ka tnad Labour ïa ki nongbylla barjylla ba rah da ki slip thok
Ha along bad 1lak ka kuna ïa ki nongaikam
Shillong, Nailur 30: Ka Labour Department ka la maham ba kan pynshitom katkum ki kyndon jong ka aiñ lada lap ïa ki certificate lane ki slip thok ha ka jingrejistar ïa ki nongbylla bar jylla ha ka por ba ki pyni ha ki khyrdop talasi (check gate) bapher bapher kiba don ha ka jylla.
Ïa kane la pyntip da u Labour Commissioner, Bah Banteilang Kharshandi, ha ka kyrwoh kaba la pynmih ha ka Sngi Balang. Shuh shuh u la ong ba ka jingpynïapher lane ka jingpynkylla khlem jingbit ïa ki kot ki sla da ka jingthmu ban leh thok ka long ka kam kaba lah ban shah pynshitom hapoh Section 336 jong ka Bharatiya Nyaya Sanhita.
Kane ka jingmaham ka wan ryngkat bad ka jingpynkynmaw biang ïa ka Meghalaya Identification, Registration (Safety & Security) of Migrant Workers Act & Rules 2020, kaba pynbor ban rejistar ïa baroh ki nongtrei bar jylla bad ban pynmih ïa ka registration card kaba kyrpang.
“Ka application fee ka long khyndai phew tyngka, “ la ong ka kyrwoh, da kaba bynrap ba ïa ki application dei ban phah online sha u Registering Officer ba dei peit lyngba ka Labour Commissioner portal, Invest Meghalaya portal, Meghalaya State Public Service Delivery Commission portal, ki CSCs, lane ki help desk ha ki District Labour Office.
Katkum ki Rules ba la pynkylla ha u 2026, ki kot kiba donkam ki kynthup ïa ka Voter ID, Driving Licence, PAN, BPL Card, lane kano kano kawei pat ka kot sorkar kaba don ryngkat bad Aadhaar, nalor ka jingpynshisha da ki pulit. Ka jingpynshisha ba shipor yn leh lyngba ka CCTNS, katba ka jingpynshisha kaba khatduh dei ban pyndep da ki pulit hapoh 30 sngi.
La ong ruh ba ka registration card ka treikam na bynta 179 sngi, bad ka jingaplai ban pynthymmai dei ban leh ym duna ïa ka 30 sngi shuwa ban kut ka jingtreikam jong ka card.
Ka tnat ka la ong ba ki nongai kam bad ki contractor kiba thungkam ïa ki nongtrei bar jylla kiba khlem registration kin ïakynduh ïa ka jingpynshitom kaba la pynbeit katkum ki kam ba ki leh.
La pyntip ba na ka bynta ka jingpynkheiñ kaba nyngkong, ka kuna kan long Rs. 10,000, na ka bynta ka jingpynkheiñ aiñkaba ar, ka kuna kan long Rs. 25,000 bad na ka bynta ka jingpynkheiñ aiñ kaba lai bad ki jingpynkheiñ kiba bud, ka kuna ka lah ban long haduh Rs. 1 lakh, lane ka jingshah set phatok kaba haduh lai bnai, lane baroh ar.