Nalor ka jingshah thngan u President, sa ka Rally paidbah ban dawa weng aiñ khang tih dewïong

Jowai, Jylliew 15: Ha ka khubor bala phah da u Information Secretary ma Overcome Dkhar bad u Chairman ma Shemphang Langstang ka Jaiñtia Coal Owner and Miners Supplier Workers Association, la ong wat hadien 14 sngi ka jingshah thngan u President ka JCOMSWA ma Marshall S.B. Biam hynrei ym pat ïoh jubab na ka sorkar.
Halor kane ka jingsngap mynthi bad bym suitñiew ka sorkar ïaka jingdawa ka Association bad ka jingshah thngan u President jong ka u ma Marshall S.B Biam, la pyntip ba ha ka 16.06.2026 ka Association bad ki nongkyrshan jong ka kin pynlong ïaka rally paidbah ka ban sdang na Madan bah Lad-Rymbai Dongwah, ka jaka ba shah thngan u ma Marshall S.B Biam bad leit tur sha DC ophis Khliehriat East Jaiñtia Hills District.
Naka liang ka Association ka kyntu ïa baroh kito kiba don par dewïong, ki nongkhaïi, ki nongtrei dewïong, ka Driver Truck Owner Association, ki seng longkmie bad ïa baroh ki sengbhalang kiba don hapoh ka District ba kin wan ai jingkyrshan bad ïashim bynta lang ha kane ka Rally, ka Rally paidbah kaba dawa na ka sorkar ba kan pynlait shi syndon ban tih Dewïong kumba ka long hashwa ki 12 snem kiba mynshwa.
Mynta ka lah sngi U Blei uwei na ki nongshong shnong ka Sutnga ula wan ban ai jingkyrshan u ïa u President JCOMSWA ma Marshall SB. Biam bad ai jingkren ruh halor ki mat kiba ka Association kala phah sha ka sorkar.
Katba na ka liang ka kong Bindas Syiem kaba ju shong shah thngan haduh 6 sngi na ka bynta u surok na Umden sha Nongpoh Sonapur Road 2024 na ka shnong Mawlong Nongtluh ha ryngkat ka kong Aitilang Manner na ka shnong Pala kila wan ban synrang lang ha kane ka sngi.