Ngin nym ailad ba thmu ka sorkar ban pynduh noh ïa ka Deficit System: President Jowai Zone

Jowai, Naiwieng 12: Ki nonghikai skul All Deficit Teacher & Employees hapoh ka lama jong ka Khasi Jaiñtia Deficit School Teacher Association (KJDSTA) kila pynlong ïaka jingïakhih bakhlem buh por (Indefinite Strike) kaba la sdang naduh ka 11 tarik u Naiwieng, 2026.
Mynta ka sngi ba ar 12 tarik u Naiwieng naka liang ka Khasi Jaiñtia Deficit School Teacher Association (KJDSTA) Jowai Zone bad ka Amlarem Zone kila ïasnohkti lang ban pynlong ïaka jingïakhih shong kyllaiñ myngngor ha Moosalangkat ha phyllaw ka ïing mane bah ba dang shna thymmai jong ka Balang Katholik Parist, Jowai.
Na ka liang u President ka KJDSTA Jowai Zone u ma Julius Lyngdoh haba ai jingkren sha ki lad pathai khubor ula ong ka jingmih ïakhih jong ki ka long halor ki nongrim ban dawa ïaka hok na ka sorkar kiba la sah teng la ar snem khlem pat pyntreikam. Kum ki nonghikai ka kamra jong ngi ka long ban don haki kamra klas hynrei ngi la hap ban mih shakhmat ban dawa ïa ki mat kiba ka sorkar kala kular ban pynurlong hashwa ha puja hynrei haduh mynta ki dang sahteng.
Ula ong ka jingdawa ba nyngkong ka long halor ka Dearness Allowance (DA) Arreal kata naduh u snem 2024 naka bynta ar bnai (January, February) kaba 43 percent, hynrei haduh mynta ka sorkar kam pat pyllait, da kaba pynsngew mynta kala poi sha ka 53% khlem pat ïoh satia.
Kaba ar ka jingdawa ha kaba ïadei bad ka jingsiew ïa ka Centralised Provident Fund (CPF) sha ki nonghikai kiba la shong thaid naka kam bad kumjuh sha ki nonghikai kiba dang hikai mynta, ula ong ka sorkar kala dep phah transfer ïaka sha ka Central Account kaba don ha SBI Laitumkhrah, Branch da ka jingkyrmen ban ïoh ïa ka hynrei haduh mynta u snem 2026 ym pat ïoh satia, kaba sngewsih shuh shuh ka long ba ka sorkar kala pynmih pynban da ka skim kaba thymmai kata ka ‘Scheme 2026’ kaba long beaiñ ïaka Provident Act 1969. Ka sorkar kala pyntip ruh ïa ka skim 2023 kam long shuh kaba biang namar ki khlem ïoh ka jingmynjur bad ka jingkylli mynta balei pat ki phah ban tranfer ïa ka Account jong ki, halor kane kila kyntu ia ka sorkar ban pynbeit noh kloi ïa kane ka pisa kaba kila dep ban pyllang naduh ba sdang trei kum ki nonghikai Deficit.
Kaba lai pat ka jingdawa ka long halor ki kam kiba dang thylli (vacant post) haki Deficit namar haduh mynta ym pat shem la khot Advertisement (Written bad Interview), haka jingïakren ka sorkar bad ki nonghikai Deficit kala pynklumar pynban ïa ki ban ïaid shakmat ne ban sangeh namar ka jingkren kyllait palat naka sorkar, ula ong kine baroh dei ba don jingthmu ka sorkar ban pynduh noh ïa kane ka ‘Deficit System’ bad ngin ym ailad ïa kane namar kaba lah ban ktah ïa ka samla hadien, la ong shuh shuh u ma Lyngdoh.
Ki dang don shibun ki mat jingdawa ïa ki nonghikai Deficit hynrei kine ki 3 tylli ki long ki mat ba donkam, kumta la kyntu ïa ka sorkar ban pyntreikam noh ïa kine ki mat jingdawa khnang ba ki nonghikai kin ïoh ban leit noh sha ki skul ban ïadonlang bad ki khynnah skul.
Kane ka jingïakhih khlem buh por kan dang bteng bad kan dang don ka jingïapynbeit bad ki nongïalam ka Central Body katba ka sorkar kam pat khot ïakren ïa ki.