Dei ban thaw ïa ki Flood Crisis Management Team (FCMT) ha manla ki jylla jong ka ri: Amit Shah

New Delhi, Jylliew 15: U Myntri Kam Pohïing ka sorkar pdeng bad u Myntri ka tnad ïatreilang, u Amit Shah, u la peit bniah ïa ka jingpynkhreh jong ka ri ban ïakhun ïa ki jingshlei um bad ka jingshit kaba lah ban mih ha ka rukom kaba bniah ha ka jingïalang jong ki heh sorkar kaba la pynlong ha New Delhi.
Haba ai jingkren ha kane ka jingïalang, u Myntri Kam Pohïing jong ka sorkar pdeng u Amit Shah u la ong ba dei ban kynthup ym duna ïa ka 60 tylli ki pung ha ka jingthmu ban thaw ïa ka rukom ai jingmaham kloi na ka bynta ki 30 tylli ki pung kiba don jingma ha Jammu & Kashmir, Ladakh, Uttarakhand, Himachal Pradesh, Arunachal Dipradesh, bad Sikkim ryngkat ka jingkyrshan jong ka National Disaster Management Authority (NDMA).
U Shah u la ong ruh ba dei ban don ka rukom treikam kaba ïasohlang na ka bynta ban ïoh jingtip lypa shaphang ka jingshlei um ha ki kyrdan jong ka Sorkar Pdeng bad Sorkar Jylla.
U Myntri Kam Pohïing ka sorkar pdeng u Amit Shah u la ong ba dei ban thaw bad pyntreikam ïa ki Flood Crisis Management Team (FCMT) ha man la ki jylla jong ka ri. U la ong ba ki jingbthah ba la pynmih da ka National Disaster Management Authority (NDMA) na ka bynta ki jingjia lynshop ki bor ka mariang ki la ïalam sha ka jingsngewthuh kaba kham bha bad ka jingpynwandur ïa ka rukom treikam “Jong baroh kawei ka Sorkar”, hynrei ka jingbishar bniah ïa ka jingbud ryntih ïa kine ki jingbthah ha ki jylla, distrik, bad municipal ka lah ban pynkhlaiñ shuh shuh ïa ka jingpyntreikam ïa ki.
U la ong ruh ba ka NDMA kadei ban pynlong ïa ka jingwad bniah ban bishar katno tylli ki jylla ki bud ïa ki jingbthah jong ka Tnad Kam Pohïing bad ki kyndon jong ka NDMA na ka bynta ban ïaleh pyrshah ïa ki jingpluh khlaw, ka jingshit, bad ki jingshlei um.
U Myntri Kam Pohïing jong ka sorkar pdeng u la ong ba hapoh ka jingïalam jong u Myntri Rangbahduh ka ri u Narendra Modi, dei ban shim ïa ki sienjam ban pyntreikam ïa ka jingthmu jong ka Zero Casualty Disaster Management. U la ong ba dei ban wad ïa ki lad ki lynti kiba kham heh na ka bynta ban pynneh pynsah ïa ka um bad ban kyntiew ïa ka um kaba don hapoh khyndew lyngba ki projek pynlang um bad check dam. Ka jingthmu jong ngi kadei ban long ban pynneh pynsah ïa ka um da kaba shna ïa ki check dam ha ki wah katba dang pynduna ruh ïa ka jingktah jong ka jingshit.
U la ong shuh shuh ba dei ban pyndonkam ïa ka CAMPA Fund ban shim ïa ki sienjam kiba kham bun bynta kiba thmu ban pynneh ïa ka jinglong ryntih jong ka mariang.
U Amit Shah u la ong ba dei ban pynkhreh ïa ka master plan ban weng ïa ki jingkylla ha ka jinglong ka suiñbneng kiba mih na ka jingkylla ka suiñbneng bad ki jingeh kiba nang kiew kiba ïadei bad ki jingjia lynshop ki bor ka mariang kiba mih na ki da kaba pdiang ïa ka rukom treikam “Jong baroh kawei ka sorkar” bad “Jong baroh kawei ka imlang sahlang”. U la bthah ïa ki ophisar jong ki tnad sorkar pdeng bad ki tnad kiba don ha kane ka jingïalang ba kin pynleit jingmut ha kaba pynskhem bad kyntiew ïa ki app bad ki portal kiba la don lypa ha ka jaka ban shna thymmai. U la ong ruh ba dei ban pynsaphriang jingtip lypa shaphang ka jinglong ka suiñbneng bad ki jingai jingtip lypa.
U Myntri Kam Pohïing jong ka sorkar pdeng u Amit Shah u la ong ba dei ban shim ïa ki sienjam ban kyntiew shuh shuh ïa ka jingkheiñ jong ngi ïa ka aïom slap ban wan da kaba wad bniah ïa ki jingïap ha ka aïom slap, ka jinglong thikna jong ki jingbatai lypa jong ngi, bad ka jingjulor ïa ka kam rep kam riang.
U Amit Shah u la ïaroh ïa ki kam ba la pyntrei da ki tnad sorkar pdeng bad ki tnad ba ïashim bynta ha kane ka jingïalang, bad kumjuh ruh ïa ka jingïatreilang hapdeng jong ki. U la ong ba ka por mynta ka la dei ba ki jingthmu jong ngi kiba ïadei bad ka jinglong ka suiñbneng kin poi sha ki jaka nongkyndong.
Hapoh ka jingïalam jong u Myntri Rangbahduh ka ri u Narendra Modi, u Myntri Kam Pohïing ka sorkar pdeng u Amit Shah u la buh hakhmat eh ïa ka jingpynkhreh na ka bynta ban pynduna ïa ka jingktah na ki jingshlei um bad kiwei kiwei ki jingjia lynshop ki bor ka mariang. Man la u snem, u Myntri Kam Pohïing jong ka sorkar pdeng u ju pynlong ïa ka jingbishar bniah ïa ka jingpynkhreh shwa ka jingshlei um, bad la shim katto katne ki sienjam kiba kongsan katkum ki jingbthah jong u. Kine ki kynthup ïa ka jingpynjlan ïa ka por ba la buh lypa na ka bynta ka jingantad ïa ka por slap bad jingshlei um da ka India Meteorological Department (IMD) and the Central Water Commission (CWC) na ka 3 sngi sha ka 7 sngi, kumjuh ruh ban kyntiew ïa ki jingthew ïa ka bor ban kheiñ lypa ïa ka jingshit.
Ha kane ka jingïalang la ïadonlang u Myntri ka tnad Jal Shakti jong ka sorkar pdeng u C. R. Patil, u Union Home Secretary, ki secretary bad ki heh ophisar jong ki tnad bapher bapher, ki dkhot bad ki heh jong ki tnad jong ka National Disaster Management Authority (NDMA), ki Director General jong ka National Disaster Response Force (NDRF) bad ka India Meteorological Department (IMD), ki Chairperson jong ka National Highways Authority of India (NHAI) bad ka Central Water Commission (CWC), nalor ki heh ophisar na ka National Remote Sensing Centre (NRSC) bad kiwei kiwei ki tnad kiba don bynta.