Wat ïanujor ïalade bad ki nongshna khubor social media, ong u CM ïa ki nongthoh khubor ha ka National Press Day
Shillong, Naiwieng 16 : U Myntri Rangbah ka Jylla, u Conrad K Sangma, ha ka Sngi Nyngkong u la kyntu ïa ki lad pathai khubor ka Meghalaya ban pynkhlaiñ ïa ka jingtbit jong ki ha ka kam pathai khubor lyngba ka jingpynithuh kyrpang kaba lah ban pynïapher ïa ki nongthoh khubor kiba la tbit na ki nongshna khubor social media.
Haba ai jingkren ha ka jingïarakhe ïa ka National Press Day 2026 kaba long ha Shillong, u Myntri Rangbah u la ong ba ki nongthoh khubor kiba la tbit ha ka kam kim dei satia ban pynïanujor ïalade bad ki YouTuber lane ki nongshna khubor social media kiba shu put turoi bad pynsawa jubor ïa ki jingtip. U la kyntu ruh ïa ki nongthoh khubor ban phai biang sha ki nongrim tynrai jong ka kam pathai khubor bad ban pynleit jingmut ha kaba pynmih ïa ki khubor kiba shisha, kiba bniah bad kiba don jingmut.
“Ki lad pathai khubor kiba la tbit ha ka kam kim donkam satia ban pynïanujor ïalade bad kito kiba pynsawa jubor,” ong u Myntri Rangbah da kaba kyntu ba ki nongthoh khubor ki dei ban don la ka jong ka jinglong kyrpang ban pyntip sha ki paidbah ym ban shu bud tynneng tangba leh kiwei.
“Ka Shillong Press Club bad Meghalaya Editors and Publishers Association (MEPA) ki dei ban bishar bniah bad ban wad ïa ki lad ban pynbeit thymmai bad pynbha ïa ka rukom treikam jong ki, khnang ban pynkhlaiñ ïa ka jingshaniah jong ki paidbah ha ka kam pathai khubor kaba shisha,” u la ong.
Ha kajuh ka por u la ai jingmut ruh ban sdang ïa ka rukom ai jingithuh kaba kyrpang ïa ki nongthoh khubor kiban pyni kiba pyni ïa ka jingshemphang bad ka jinglong kyrpang jong ki namar kum kine ki sienjam kin ïarap ïa ki paidbah ban pynïapher ïa ki nongthoh khubor kiba la ïoh jingithuh bad jinghikai na kiwei pat ki nongshna khubor dalade hi.
U Myntri Rangbah u la pynpaw ba u thrang ban ïohi ïa ki khubor kiba shisha, kiba don ïa ka jingwad bnïah, ka jingmut jingpyrkhat kaba jylliew bad ka jingbishar bnïah, ban ïa kaba shu ïoh ïa ki jingtip kiba pynmih khlem da don ka jingwad bnïah bad kiba shu long tang ki mat pynsawa paidbah.
Shuh shuh u ong ruh ba ki lad pathai khubor kiba shisha kin ïoh ruh ïaka jingkyrshan bad ka jingithuh na ki paidbah lyngba ki tyllong jingtip bad ki ai bad kane ka pynlong ïa ki ban ïoh ïa ka jingshanïah bad ban shim ïa ki rai kiba dei halor kaei kaba ki pule bad ïohsngew.
Haba ban jur halor ka jingdonkam jong ka jingroi ha ka kam, u Myntri Rangbah u la kyntu ïa ka jingdonkam ban pynkhlaiñ ïa ki prokram ai jinghikai khnang ban kyntiew ïa ka jingtbit bad ka jingshemphang jong ki nongthoh khubor. U la kular ba ka Directorate of Information and Public Relations (DIPR) kan long kaba kloi ban ïarap bad kyrshan ïa ki sienjam kiba thmu ban kyntiew ïa ka jingpyntbit bad ka jingroi jong ka kam pathai khubor ha ka jylla.
U la pynpaw ruh ïa ka jingdonkam ban ithuh ïa ka jingïapher hapdeng ki nongthoh khubor kiba la ïoh jinghikai bad kiba la don jingshemphang ha ka kam bad ki briew kiba pynsaphrïang ïa ki jingtip lyngba ka YouTube bad kiwei pat ki social media, hynrei u la pynshai ba kane kam mut ba ka Sorkar kam burom ïa ki nongpynmih content.
Haba ïadei bad ki mat kiba la pynpaw da ka Shillong Press Club lyngba ki dorkhas, u Myntri Rangbah u la pdiang ïa ki jingeh kiba ïadei bad ka jingpynkiew ïa ka mang tyngka bad ka jingpynbeit ryntih ïa ka rukom siew ïa ki advertisement.
U la ong ba ka Sorkar lyngba ka DIPR ka la shim ïa ki sienjam bapher bapher ha kine ki saw haduh san snem ba la dep ban pynbeit ïa kine ki mat, watla ka jingpyntreikam ïa ki kam ka la don ïa ki jingeh namar ka jingktah jong ki rai ha kiwei pat ki tnat treikam, ki kynhun bad ki seng bapher bapher.
“Ngin ym lah ban pynbeit lut ïa baroh ki jingeh kiba phi la pynpaw, hynrei nga ngeit ba ngi lah ban pynbeit ïa katto katne na ki, bad ngin trei halor jong ki,” u la kular.
U Myntri Rangbah u la pynpaw biang ïa ka jingkular jong ka Sorkar ban kyrshan ïa ka bha ka miat jong ki nongthoh khubor, ka jingpynkhlaiñ ïa ka jingtbit jong ki, ka jingai jinghikai bad ka jingroi jong ka kam pathai khubor ha ka jylla.
U la ong ba ka thong kaba kham heh jong ka Sorkar ka long ban kyrshan ïa ki lad pathai khubor kiba don ïa ka rukom treikam kaba ryntih bad tbit, khnang ban kyntiew ïa ka kam pathai khubor kaba shaniah ha ki jingshisha, ka jingwad bniah bad ka jingkitkhlieh.
Haba bynrap lang, u Myntri ka tnad IPR Bah Lahkmen Rymbui u la ong ba ki paidbah mynta ki donkam ïa ka khubor kaba dei, kaba shisha bad kaba shaniah.
“Ki lad ai jingtip mynta ki sted palat tangba ban pyntikna la kine ki jingtip ki dei kiba shisha neem, kata ka dei kaba kham kongsan tam,” u la ong.
Nalorkata, u Myntri u la ong ruh ba kum ki lad pathai khubor ki donkam ban don ka jingïatrei lang bad da ka jingkitkhlieh khnang ba lyngba ka kam ba ki trei kin lah ban noh synñiang lang ïa ka jylla lyngba ki jingtip kiban pynmyntoi ïa ki nongshong shnong.
Shwa kane, la ïoh ruh ïa ka jingkren na u Vice President ka Meghalaya Editors’ and Publishers’ Association (MEPA) kumjuh na u Vice President jong ka Shillong Press Club.