Kyntait ki nonghikai KJDSTA ïa ka jingkyrpad sangeh ïakhih u CM
Da kaba shong kyllaiñ myngngor ha Upper Shillong
Shillong, Naiwieng 16: Kum shi bynta ban pynbor ïa ka sorkar, ka Khasi Jaiñtia Deficit School Teachers Association ha ka sngi Nyngkong ka la kyntait ban pdiang ïa ka jingkyrpad u Myntri Rangbah ka jylla u Conrad K Sangma ban pynsangeh noh ïa ka jingïakhih bad pynbna ba kan ïai bteng beit ïa ka jingsangeh treikam ba khlem pud sngi da kaba pynpaw ba ka shithi na ka ophis u Myntri Rangbah kam shym la ai kano kano ka jingkular, ka jingbuhpor bad ka lynti ban pynbeit ïa ki jingeh bad jingdawa jong ki.
Halor kane, ha ka jingïakhih da kaba shong kyllaiñ myngor kaba la pynlong ha ka sngi Nyngkong ha Madan Sawmer, Upper Shillong kaba la sdang naduh ka por 11 baje mynstep haduh ka 2 baje nohphai sngi, haba kren hadien ka jingshimrai, u President ka KJDSTA u Babu Boswell Pala ula ong ba ki nonghikai kila ïakynduh ïa u Myntri Rangbah ha ka sngi Palei da ka jingsngewkhia mynsiem bad ka jingkyrmen kaba khraw, hynrei kila wanphai tang da ki jingkular ba yn sa shong bishar.
U la ong, “Da ka jingsngewkhia mynsiem, ngi pynbna ba ngin pynbteng ïa ka jingsangeh treikam jong ngi. Ha ka sngi Palei, ngi la ïakynduh ïa u Myntri Rangbah haduh shiteng kynta eiei, bad ha kane ka jingïalang ngi la kren ïa ki mat, khamtam haba ïadei bad ka skhim 2023 bad skhim 2026 ba kam shong aiñ.”
Shuh shuh u Babu Pala ula ïathuh ba u Myntri Rangbah ula kular ïa ka kynhun ba un sa khmih ïa kane ka kam, hynrei ka shithi kaba la pynbud ha ka por janmiet kam shym la kdew eiei ïa ka jingkular.
U la ong, “Hadien ba ngi ïakynduh, u Myntri Rangbah ula kular ha ngi ba un sa khmih ïa kane ka kam, hynrei ha ka por janmiet ha kane hi kajuh ka sngi, ngi la ïohpdiang ïa ka shithi na ka ophis u Myntri Rangbah ba kyrpad ïa ngi ban wengnoh ïa ka jingsangeh treikam halor ka nongrim ba u Myntri Rangbah ula sngap ïa ki mat dawa bad ula phah ïa ki sha ka Tnad Education, bad ka tnad Education kan sa shong bishar ïa kine ki mat.”
U Babu Pala u la bynrap, “Ngim tip shuh sa ïa kaei kin shong bishar, bad hadien kin sa aiti ïa ka kaiphod. Kam don satia kano kano ka jingpynthikna. Lano kin pyndep ïa kane ka kaiphod? Kumno kan long kane ka kaiphod? Wat u Myntri Rangbah dalade ula kubur ba ki jingdawa jong ngi ki long kiba shai, sa kaei pat ba kin dang bishar?”.
Na ka liang u Babu Pala ula ong ba kane ka shithi kala buh ïa ki nonghikai ha ka jingartatien ban shaniah ïa ka rukom pynïaid kam jong ka sorkar bad khamtam eh jong ka tnat Pule Puthi bad dei halor kane ba ka la pynlong ïa ki nonghikai ban shim ïa kine ki sienjam jong ki jingïakhih sangeh treikam.