Shillong, Naitung, 29: Ka Seng Samla Mawlai Pyllun hynne ka sngi ka la kynduh biang ïa u Myntri ka tnad Urban Affairs ba dei ruh u Symbud Myntri Rangbah ka jylla Bah Sniawbhalang Dhar ban buddien biang halor ka jingdawa jong ki ban pynkynriah noh kham kloi ïa ka marten napoh Mawlai.
Haba kren bad ki lad pathai khubor, u General Secretary ka SSMP, Bah Samran Syiem u la ïathuh ba katei ka jingwan jong ki ka long ban pynkynmaw biang ïa u Myntri haba ïadei bad ka jingdawa kaba ki la buh naduh u snem 2021 khnang ba katei ka thain kan lait noh na ka iwtung.
“Mynta la ïaid ar tylli ki snem, kumta ban sngewthuh ïa ka jingïaid kane ka kam ngi la ïoh ban ïakren bad la pyntip ïangi ba ka kam ka la ïaid shakhmat. Kumta, ngi ruh ngi kyrmen skhem ba kan poi sha ka thong jong ka jingjop,” u la ong.
Shuh shuh u la ïathuh ruh ba ka sorkar lyngba kawei ka kompeni ki la treikam ban pynkylla ïa ki jaboh jabaiñ sha ka spah ka phew bad ka kam ka la sdang bad ïaid shakhmat.
“U Myntri u la pyntip ruh ba na ka liang ka Shillong Municipal Board ka la sdang ban pynduna ïa ka jaboh jabain kaba don mynta ha Marten ha Mawlai namar mynmiet mynmiet ka la kit noh ïa ki jaboh ba long plastik sha ki kompeni bapher bapher.”
Shuh shuh u ong ruh ba hadien ba ki la lah ban weng noh ïa katei ka jaka thehñiut nangtei na Mawlai kin sa lah pat ban pynkylla dur ïa ka.
