Kum ka jingburom ïa ka Sngi U Blei la pynkynriah ïa ka jingïalang CPA sha ka por shiteng sngi
Shillong, Naitung 29: Kum shi bynta ban burom ïa ka Sngi U Blei, ïa ki prokram jong ka Commonwealth Parliamentary Association of India (CPA) la rai ban pynkynriah bad sdang noh hadien ka 12 baje nohphai sngi hadien ba wai ki jingïaseng.
ïa kane la pyntip da u Myntri Rangbah ka jylla Conrad K Sangma haba jubab halor ka jingkylli, balei ba pynlong ïa ka jingïalang ha ka sngi U Blei namar ka Meghalaya ka dei ka jylla kaba bun ki Khristan kiba donkam ban leit jingïaseng.
Haba kren sha ki lad pathai khubor u Conrad ula ong “Baroh ngi ïa tip ba ka Dorbar jong ka Lok Sabha ka dang ïaid bad u Lamphang ka Lok Sabha bad kiwei ki Ophisar ki don por tang Sngi Saitjain bad Sngi U Blei ban wan sha kane ka jingïalang”.
U Conrad ula ong “Kim don por bad dei namar kane wat ïa ki prokram jong ka CPA ruh la kham pynlyng kot noh bad la bthah ruh ba ki prokram lashai ka sngi kin sdang noh hadien ba wai ki jingïaseng kata hadien ka 12:25 baje Nohphai sngi”.
U Conrad ula ong ba ka sorkar ne ka ïingdorbar ka sngewthuh ïa ka jingsngew ki riewngeit Khristan hapoh ka jylla hynrei ym lah pat ban pynduh ïa ka jingïalang lashai ka sngi (Sngi U Blei) namar ba ka dorbar Parliament ka dang ïaid bad dei tang ha kane ka por ba u Lamphang bad ki Ophsiar kin ïoh por ban shim bynta ha kane ka jingïalang ha Shillong.
Haba batai halor ka jingdonkam ban pynlong ïa ka jingïalang CPA, u Conrad ula ong ba kane ka jingïalang ba 20 jong ka CPA ka dei na ka bynta ban ïatai halor ki mat kiba donkam eh na ka bynta ka thaiñ shathei Lammihngi (North East).
U Conrad ula ïathuh ba ha kane ka jingïalang ka CPA ka la buh ïa ki mat ban ïatai ba kynthup ïa ka jinglong jingman bad ka jingkylla ka mei mariang, ka jingshah lyngshop ha ka bor mariang bad ka jingdonkam ban pynïoh ïa ki surok synkien naka bynta ban pynïasoh ïa ka thaiñ shathei lam mihngi (North East) bad ka ri India baroh kawei.
“Kane ka jingïalang ka long kaba donkam bha bad nga dap daka jingkmen ba u Lamphang ka Lok Sabha ula shim jingkit khlieh ban ïalam ïa ka jingïalang ha Shillong bad kane ka paw shai baka Sorkar Pdeng ka don jingkit khlieh ban kyntiew ïa ka thaiñ shathei Lammihngi (North East) baroh kawei” ula ong.