Na ka sorkar dawa ki nongtrei Midday Meal ban ai shuti ha ka por armet bad ba pang ba shitom

Nongpoh, Naitung 29: Ka kynhun ki nongshet ja Midday Meal ba la tip kum ka Union Cook Cum Helper PM Poshan Meghalaya mynta ka sngi ki la pynlong da ka jingïakynduh lang ha Nongpoh shi bynta ban ai khublei kyrpang ïa u Myntri rangbah ka jylla, u Conrad K. Sangma bad ha kawei pat ka bynta ban ïa kren halor katto kante ki mat kiba kum ki nongbylla sngi ki donkam ban ioh ka jingïarap na ka sorkar jylla.
Kumba la pynpaw da ka Kong Banalis Syiem, kum ka President jong katei ka kynhun, ka la pynpaw ïa ka jingkhublei ba kyrpang eh ïa u Myntri Rangbah ka jylla u Conrad K. Sangma halor ka jingshim khia jong u ïa ki jingangnud ki nongshet ja midday meal kata ban kyntiew noh ïa ka bai bylla sngi ba la pynkiew sha ka T. 1100 tshi bnai bad ruh ba ka sorkar ka la pynlait lut ïa ka pisa kaba dei hok ban ioh jong u snem 2022.
Na ka liang u Bah K.L Pariat, u Founder bad Adviser kane Union Cook Cum Helper P.M Poshan Meghalaya, u la ong ba ka daw kaba la pynlong ïa kane ka jingïakynduhlang ka long ban pynpaw ïa ka jingsngewnguh halor ka jinglah u myntri rangbah ban pynurlong ïa ki jingangnjud ki nongshet ja midday meal ha ka jylla bad u la pynpaw ruh ba kane ka kynhun jong ki Longkmie ki donkam ruh ban ioh ïa ka jingithuh kaba tina na ka ka sorkar jylla khnang ba kin nym ïa kynduh jingeh halor ki kam ba ki shakri ha ka jylla.
Shuh shuh, u la ong ruh ba ka Union ka kyntu ïaka sorkar ba kine ki Nongtrei Midday meal ki la dei ban don ruh ka shuti khnang ba kin ïoh ban shong jah thait ha ïing ha ki por ba ki shitom lane ha kipor ïoh khyllung, namar kum ba long mynta kim ïoh ïa kano kano ka shuti bad ki hap ban beh trei wat haka por ba ki don haka jingshitom jong ka met lane ha ki por ba ki armet, u la bynrap.