Yn ïaid paidbah ka KSU ha Nongpoh ban pyshah halor ka jinglip bording ba khah khah ha Ri Bhoi

Nongpoh, Naitung 29: Ka Khasi Student Union, Nongpoh Circle ka la shim syndon da ka rai ban pynlong da ka jingïaid paidbah ha Nongpoh ban pynpaw ïa ka jingpyrshah halor ka jingshah ktah palat ki paidbah na ka jinglip bording ba khah khah ha ka thaiñ Nongpoh bad ha Ri Bhoi District hi baroh kawei.
Ka KSU Nongpoh Circle mynta ka sngi ka la pyntip paidbah ba ïa kane ka jingïaid paidbah yn pynlong ha ka 2 tarik u Nailar 2023 naduh ka por 12 baje mynsngi ha kaba ka jingïaid paidbah kan sdang na Pahamsyiem bad pynkut ha ophis ka tnad bording kaba don ha Umlyngkdait Nongpoh.
Kumba la pynpaw da u General Secretary sha ki lad pathai khubor, u Samla Baïashanlang Kharshanlor u la ng ba ka seng ka la shim ïa kane ka sienjam ban pynlong da ka jingïaid paidbah ka long ban pyrshah halor ka jinglip bording ba khah khah ha ka thaiñ Nongpoh bad ïa kane la sakhi na ka por sha ka por ba ki paidbah kim ju ioh thikna ka bording ilektrik na ka jingthud kaba la ktah man la ka por.
U laong ruh kum ka seng kam banse ban shim ïa kane ka sienjam ban khot ban wer ïa ki paidbah ba kin ïa snoh kti lang bad ka seng, namar kane ka jinglip bording ba khah khah ka la ktah lut ïa ki kam ki jam bad kiwei kiwei ki kam kiba ki paidbah ha kane ka juk stad mynta khlem ka bording ilektrik ki kam ki la sahkut bad duh jingmyntoi lut.
Namarkta, na ka liang ka KSU Nongpoh Circle ka khot ka wer ïa ki paidbah ba kin ïa shim bynta lang ha katei ka sngi kum ka jingïatylli lang ban pyrshah ïa ka tnad bording halor ka jingbym lah jong ka ban pynbiang thikna ïa ka bording ilektrik bad katba ki paidbah pat man la u bnai ki hap ban siew ïa ka bai bording ilektrik, u la bynrap.