Dawa ka FKJGP ban pyntreikam noh ïa ki Street Light, pynkynmaw ruh halor ka Answer Key jong ka eksam DSC

Nongpoh, Naiwieng 5: Ka Federation of Khasi Jaintia and Garo People (FKJGP), Nongpoh Circle, ka la leit ban aiti ïa ka dorkhas sha u Deputy Commissioner ka Ri-Bhoi, Dr. Abhishek Saini, halor ka jingbym pat pyntreikam ïa ki Street Light kiba la dep pynïeng ha shilynter jong ka surokbah hapoh sor Nongpoh bad ha kiwei pat ki bynta jong ka Ri-Bhoi District.
Ha kane ka jingleit ïakynduh, ki nongïalam jong ka seng ki la pynkynmaw ruh ïa ka jingthoh ba ki la dep phah sha u Deputy Commissioner, kaba ïadei bad ka jingdawa jong ka seng ban pynmih paidbah ïa ki Answer Key bad ki marks jong ki samla kiba la ïakhun ïa ka eksamin DSC ha Ri-Bhoi District.
Haba kren sha ki lad pathai khubor hadien ka jingïakynduh, u Samla Precious Khymdeit, President ka FKJGP Nongpoh Circle, ha ka jingïadonlang ki dkhot jong ka seng, u la pynpaw ïa ka jingsngewkhia halor ka jingbym pat pyntreikam ïa ki Street Light, wata ka jingpynieng ïaki la dep la palat shisnem.
U la ong ba ka jingbym pat pyntreikam ïa kitei ki Street Light ka pynlong ïa ka seng ban buh jingkylli halor ka jingtreikam jong ki, namar bun naki street light bala dep pynieng kila sdang ban khyllem bad ap jingma pynban ïaki paidbah, khamtam ha ki jaka sor ba don bun kiba ïaid ba ieng naduh ki kali bad briew.
Kumta, ka seng ka kyntu ïa u Deputy Commissioner ban shimkhia ïa ka jinglong jingman jong kitei ki street light bad ban pynthikna ba la pynskhem bha ïa ki, khnang ban lait na kino-kino ki jingjia ba sngewsih bad ban pynthikna ïa ka jingshngaiñ jong ki paidbah.
Shuh shuh, u Samla Precious Khymdeit u la ïathuh ba ka seng ka la pynkynmaw ruh ïa u Deputy Commissioner halor ka jingdawa ban pynmih paidbah ïa ki Answer Key bad ki marks jong ki nongïakhun ïa ka eksamin DSC ha Ri-Bhoi. Ha kaba ïadei bad kane, u Deputy Commissioner u la kular ba yn sa pynmih ïa ki Answer Key hadien katto-katne sngi, hynrei ïa ki marks jong ki nongïakhun ym pat lah ban pynmih paidbah.