Mana ka bor Distrik Ri Bhoi ban dih duma ha jaka paidbah ha ka tamasa Cherry Blossom
Nongpoh, Naiwieng 20: U Dr Abhishek Saini District Magistrate ka Ri-Bhoi District u la pynmih ïa ka hukum ban khanglad ïa ki paidbah ban dih duma haka jaka ba pynlong ïaka tamasa Cherry Blossom ban pynlong kum ka jaka ba lait naka tdem duma ne Smoke-Free Zone, ha kaba yn shah ban dih duma tang ha ki jaka ba la buh kyrpang.
Kum ban shu pynpaw ka tamasa Cherry Blossom 2026 kala sdang mynta ka sngi bad kan kut lashai ka 21 tarik Naiwieng 2026 ha RBDSA Sports Complex, Kurkalang, Bhoirymbong.
Ïa kane ka hukum la pynmih na ka bynta ban pynthikna ïa ka koit ka khiah, ka jingshngaiñ, ka jingkhuid jingsuba bad ka jingdon ka sawdong sawkun kaba koit ba khiah na bynta baroh ki nongwan jngohkai, ki nongshim bynta, ki nongdie jingdie, bad kiwei pat kiba wan sha kane ka tamasa.
Katkum kane ka hukum, yn khang pyrshah ïa kino kino ki briew ban dih duma ha baroh ki bynta jong ka jaka pynlong tamasa, kynthup ïa ki jaka paidbah, ki jaka rung bad mih, ki dukan, ki jaka bam bad ki jaka shong paidbah, lait noh tang ha ki jaka dih duma ba la buh kyrpang da ki bor pynïaid.
La bthah ruh ïa ki bor ba dei peit ban buh ïa ki dak jingmaham “no smoking area” ha ka jaka pynlong tamasa, khnang ban pynsngewthuh ïa ki paidbah bad ban pynthikna ïa ka jingbud ryntih ïa kane ka hukum.
Kino kino kiba pynkheiñ ïa kane ka hukum kin shah pynshitom katkum ki kyndon aiñ, kynthup ïa ka Cigarettes and Other Tobacco Products Act (COTPA), 2003, bad kiwei kiwei.