Ka jingjop ha ka kam jngohkai pyrthei ym dei tang ka jingbun ki nongwan bad ka jingbei tyngka: Conrad
Da ka jingïashimbynta jong ki nongshong shnong
Shillong, Naiwieng 20: U Myntri Rangbah ka jylla u Conrad K Sangma u la leit ban ïa shim bynta ha ka Outlook Indian Responsible Tourism Summit & Awards 2026 ba la pynlong da ka Tourism Department ha ryngkat ka jingiatreilang bad ka Outlook bad ka Outlook Traveller.
Haba pdiang sngewbha ïa ki nongmihkhmat, ki nongkren, ki nongtreikam, ki paralok bad ki nongïashim bynta na kylleng ka ri sha ka jingïalang kaba saw jong ka Outlook Indian Responsible Tourism Summit & Awards 2026 – Meghalaya Chapter, u Myntri Rangbah ka Jylla u la ong ba ka sorkar Meghalaya ka la ithuh ïa ka kam jngohkai pyrthei kaba lah ban pynroi ïa ka kam jngohkai pyrthei kum kawei na ki lad ka ban pynbiang ïa ka kamai kajih jong ki briew.
“Ki nong jngohkai pyrthei ki wan ban mad ïa ka kolshor, ka riti dustur, ki jaka ba itynnad, ki jingrwai, ki jingbam bad baroh kaba ka Meghalaya ka ai,” u la ong.
Shuh shuh u la pynpaw ba ka kam jngohkai pyrthei ka dei ka lad kamai kaba kongsan na ka bynta ka Meghalaya bad pyntip ba ka rukom treikam jong ka jylla ka buh ïa ki paidbah, ki nongseng kam seng jam bad ki karkhana trai ri ha pdeng jong kane ka jingroi, ryngkat bad ka jingbei tyngka ha ki jingtei, ki lad kamai bad ka jingpynneh pynsah ïa ka kolshor, ka jinglong kyrpang bad ka pateng mariang.
Da kaba pynpaw ïa ka jingkmen kaba khraw halor ka kyrdan jong ka Meghalaya ha ka BBC ha ki 20 tylli ki thup jaka ba dei ban leit jngoh ha u snem 2027 napdeng ki ri ka pyrthei u Myntri Rangbah ka Jylla u la pyntip ba ka jingithuh ba la ïoh ka dei ka jingkut jong ki 8 snem ba la dep jong ka jingtrei da baroh ki nongshim bynta ym namar kawei ka jingleh ne jingjia.
U la pynpaw ruh ïa ki prokram, ki polisi, ki skhim, ki projek pynroi jong ka sorkar jylla, ka jingïatreilang bad ki kompeni ba pawnam bad ki nongjngohkai pyrthei bad ki nongshong shnong ban pyniar ïa ka kam jngohkai pyrthei bad ban khring ïa ki nong jngohkai pyrthei napoh ri bad nabar ri.
Ha kaba pynkut, u Myntri Rangbah u la pynpaw ba ka kam kaba don hakhmat ka long ban pynkylla ïa ki jingmut jong ka Summit sha ka jingtreikam ha ka jaka bad bynrap ba ïa ka jingjop ha ka kam jngohkai pyrthei ym tang da ka jingbun ki nongwan jngohkai bad ka jingbei tyngka, hynrei da ka jingïashim bynta jong ki nongshong shnong, ka jingmyntoi ha ka liang ka ioh ka kot, ka jingpynneh pynsah ïa ka kolshor bad ka jingïada ïa ka mariang.